На Youtube-канале KropkaBY зьявіўся трэці выпуск дайджэсту хай-тэк-навінаў Smarcik. І аўтары абяцаюць працягваць відэаблог у штотыднёвым фармаце. Каму патрэбныя такія навіны на гэтай мове?
«Мы, хутчэй, ствараем аўдыторыю. Рэальна ў нас канкурэнцыі няма ў гэтай галіне, ёсьць толькі нейкі дайджэст тэхнічных навінаў на „Белсаце“, — распавядае Свабодзе вядоўца Мікіта Іваноў. — Я спадзяюся, будуць людзі і з таго боку, і з другога: і беларускамоўныя людзі, якія зацікавяцца тэхнікай, і ІТ-шнікі, якія зацікавяцца беларускай мовай».
Відэаблог вырас з аднайменнага пабліку «ЎКантакце». У «Смарціку» зьяўляюцца як беларускія навіны, так і замежныя, усясьветныя. І, як заяўляе аўтар, замежныя навіны не капіююцца зь беларускіх расейскамоўных рэсурсаў, а перакладаюцца зь першакрыніцы.
Паралельна з «тэхнічным» відэаблогам KropkaBY працягвае выпускаць музычнае шоў «Слухай сваё» і афішу — «Imprezy», бліжэйшым часам абяцаюць і некалькі новых забаўляльных праектаў. Выпускае Smarcik тая ж каманда, але сцэнарыст і вядоўца ў ІТ-блога асобныя.
«У фармаце відэаблогу зручней і цікавей — навінаў становіцца шмат, а часу ў людзей усё менш і менш, — тлумачыць вядоўца пераход ад тэксту да відэа. — Глядзець такую падборку раз на тыдзень больш эканамічна ў часе. У форме твітэра гэта таксама можа існаваць, і твітэр у нас ёсьць, але каму як зручней».
