У Магілёве актывісты Таварыства беларускай мовы нагадалі жыхарам вуліцы імя Каліноўскага хто такі Кастусь Каліноўскі.
ТБМаўцы раздалі мінакам і раскідалі па паштовым скрыням інфармацыйныя ўлёткі пра нацыянальна-вызвольнае паўстаньне 1863-64 году. Сваю акцыю актывісты прысьвяцілі дню нараджэньня і гвалтоўнай сьмерці Каліноўскага.
«Мы ня першы год праводзім такія асьветніцкія акцыі. Пачалі іх, як даведаліся, што жыхары вуліц, названых імёнамі славутых беларусаў, ня ведаюць хто яны такія», — апавядае старшыня магілёўскай суполкі ТБМ Алег Дзьячкоў.
«Сёньня выбраліся на вуліцу імя Каліноўскага. 2 лютага ў яго быў дзень нараджэньня, а 22 сакавіка яго пакаралі сьмерцю, — зазначае актывіст. — Вуліца названая ў гонар кіраўніка паўстаньня даволі вялікая. Давялося пабегаць, але ўсё ж нагадалі хто ён такі жыхарам і ўшанавалі такім чынам ягоную памяць. У 26 год ён аддаў жыцьцё за Беларусь і беларускі народ».
Вуліца імя Каліноўскага ў мікрараёне Казіміраўка. Гэта выезд з абласнога цэнтру ў бок Менску. Назва вуліцу на шыльдах пададзена выключна па-расейску. Інфармацыйнай дошкі пра нацыянальнага героя, у гонар якога названая вуліца, няма.
«Гэта вуліца старая і шыльды вывешваліся, відаць, яшчэ за Савецкім часам па-расейску. Аднак шыльды выглядаюць новымі. Ёсьць тут нядаўна створная вуліца, названая ў гонар Скарыны. Шыльды на ёй таксама расейскамоўныя, — абураецца ТБМавец. — Трэба будзе зьвярнуць увагу чыноўнікаў гарвыканкаму на гэтую прыкрую акалічнасьць. Калі б Каліноўскі і Скарына ўбачылі, што іх імёны пададзеныя на расейскай мовы, дык пэўна дужа зьдзівіліся б».
«Што да інфармацыйных, ці мэмарыяльных дошак, дык яны вывешаныя ў Магілёве пераважна на вуліцах названых у гонар савецкіх герояў Другой усясьветнай вайны, — працягвае Алег Дзьячкоў. — А вось Каліноўскі — ён жа быў ня дужа шанаваным і ў Савецкія часы партнамэклятурай, хоць яго імя і выкарыстоўвалі па-свойму. Цяпер жа сытуацыя іншая. Каліноўскі разглядаецца ні як рэвалюцыянэр, а як нацыянальны дзеяч і да гэтага чынавенства ставіцца зь перасьцярогай».
Акцыя ТБМаўцаў доўжылася больш за гадзіну. Інцыдэнтаў ні з жыхарамі, ні зь міліцыяй не было. Жыхары ў гутарцы з журналістам называлі Каліноўскага — рэвалюцыянэрам, пісьменьнікам, паўстанцам. Заяўлялі, што ён змагаўся за свабоду і незалежнасьць айчыны.
«Ён здаецца пісаў некаму лісты. Змагаўся, як я памятую, з Расейскай імпэрыяй, але за што канкрэтна ня памятую», — паспрабавала ўзнавіць з школьных ведаў, хто такі Каліноўскі, адна зь першых апытаных жыхароў вуліцы.
"Гэта беларускі пісьменьнік Кастусь Каліноўскі, — упэўнена заявілі трое сябровак школьніц.
«Напісаў ён, здаецца, як я памятую пра... «Уб’ём фашысцкую гадзіну!», — выказала здагадку адна з суразмоўніц. «Ды не ў школе мы чыталі нейкія лісты. Здаецца «З-пад... шыбеніцы», умяшалася ў гутарку яе сяброўка. «Вось таму ён і пісьменьнік», рэзюмавала яшчэ трэцяя сяброўка.
«Ён рэвалюцыянэр 1863 году. Паўстаньне тады было ў Беларусі. Каліноўскі, здаецца, сказаў: «Не народ для ўлады, а ўлада для народу», — зазначыў наступны суразмоўца.
Да акцыі на вуліцы Каліноўскага магілёўскія актывісты ТМБ расказалі жыхарам на іншых вуліцах хто такі Віктар Тураў, Аляксей Пысін.
