Расея дала Міжнароднай асацыяцыі лёгкаатлетычных фэдэрацыяў (ІААF) афіцыйны адказ на абвінавачваньні ў шырокім ўжываньні допінгу.
«Мы пагадзіліся зь некаторымі пазыцыямі. У той жа час мы патлумачылі, што ўсе гэтыя парушэньні адбыліся пры старым кіраўніцтве Ўсерасейскай фэдэрацыі лёгкай атлетыкі некаторы час таму», — сказаў дзейны кіраўнік расейскай лёгкай атлетыкі Вадзім Зелічонак.
На экстраным пасяджэньні 13 лістапада ІААF разгледзіць пытаньне аб прыпыненьні ўдзелу расейскіх лёгкаатлетаў у міжнародных спаборніцтвах з-за допінгавага скандалу. Калі такое адбудзецца, гэтыя спартсмэны могуць прапусьціць Алімпіяду 2016 году ў Рыа-дэ-Жанэйра.
У дакладзе, падрыхтаваным WADA, сьледчыя назвалі выкарыстаньне забароненых прэпаратаў у расейскім спорце «культурай, якую падтрымлівае дзяржава».
«Няма прычынаў лічыць, што лёгкая атлетыка зьяўляецца адзіным відам спорту ў Расеі, у якім адбывалася ўжываньне допінгу», — гаворыцца ў дакладзе.
Абвінавачваньні ва ўжываньні допінгу ў лёгкай атлетыцы, а таксама пэрспэктыва таго, што расейскія спартсмэны могуць быць адхіленыя ад Алімпійскіх гульняў у Рыа-дэ-Жанэйра ў наступным годзе, гэта самы вялікі спартыўны скандал, які адбыўся ў Расеі за апошнія некалькі дзесяцігодзьдзяў.
Большая частка абвінавачваньняў у дакладзе тычыцца лябараторыі ў Маскве, якая тэставала спартсмэнаў на прадмет наяўнасьці забароненых прэпаратаў. У дакладзе сьцьвярджаецца, што лябараторыя зьнішчыла ўзоры, нягледзячы на тое, што WADA патрабавала захаваць іх, і супрацоўнікі бралі хабар ад спартсмэнаў або трэнэраў у абмен на ўтойваньне тэстаў на допінг, якія паказвалі станоўчы вынік. Расейскія ўлады заявілі, што сама WADA папрасіла іх зьнішчыць ўзоры.
