Камітэт па адборы рэктара ЭГУ адрэагаваў на заклік прадстаўнікоў беларускай інтэлігенцыі да празрыстых выбараў новага кіраўніка гэтай ВНУ.
Прэсавая служба ЭГУ даслала ў рэдакцыю Свабоды заяву Дэна Дэйвідсана, старшыні Адборачнага камітэту ЭГУ, які займаецца пошукам кандыдатаў на рэктарства, а таксама сябраў гэтага камітэту Эн Лонсдэйл, Гэнрыка Тофт Енсэна, Грэгары Прынса, якія прадстаўляюць акадэмічную супольнасьць Вялікабрытаніі, Даніі і ЗША.
«Міжнародны пошук рэктара недзяржаўнай ВНУ ня варта блытаць з выбарамі на публічную выбарную пасаду. Дзеля таго, каб на пасаду рэктара прэтэндавалі найлепшыя кандыдаты, Адборачны камітэт ЭГУ павінен гуляць па агульнапрынятых правілах для знаходжаньня акадэмічнага лідэра, што ЭГУ робіць упершыню ў сваёй гісторыі»,— зазначаецца ў заяве.
Сябры Адборачнага камітэту сьцьвярджаюць, што ў гэтым працэсе ўдзельнічаюць усе асноўныя групы зацікаўленых бакоў у рамках ЭГУ: Старшыня Сэнату, Старшыня Саюза студэнтаў і выпускнікоў ЭГУ, прадстаўнікі адміністрацыі і прэзыдэнт ЭГУ Анатоль Міхайлаў.
«Цяперашні працэс вывучэньня кандыдатур, рэцэнзій, асабістых інтэрвію, прафэсійных даведачных праверак і адкрытых дыскусій з кандыдатамі павінен праходзіць у атмасфэры, якая паважае права на недатыкальнасьць прыватнага жыцьця ўсіх кандыдатаў і канфідэнцыйнасьць самога разбору. Камітэт прызнае законныя інтарэсы грамадзянскай супольнасьці і іх права ведаць аб адборы і публікуе пэрыядычныя справаздачы для грамадзкасьці на сайце ЭГУ. Як і ў большасьці няўрадавых унівэрсытэтаў у сьвеце, найвышэйшыя паўнамоцтвы для выбару і прызначэньня наступнага рэктара знаходзяцца ў руках Рады дырэктараў ЭГУ і заснавальнікаў».
Адборачны камітэт зазначае, што зрабіў усё магчымае для захаваньня празрыстасьці і магчымасьці назіраньня за гэтым працэсам, у прыватнасьці публікаваліся абвесткі аб адборы, 7 фіналістаў запрашалі ў Вільню для сустрэч са студэнтамі і выкладчыкамі.
Апошнім часам Камітэт зьвярнуўся да асобных кандыдатаў як па тэлефоне, так і ў пісьмовай форме з дадатковымі пытаньнямі.
Камітэт зробіць сваю рэкамэндацыю Радзе дырэктараў ЭГУ ў лютым. Вынік адбору, як чакаецца, будзе абвешчаны не пазьней за 1 сакавіка 2015 году.
Сярод сямі фіналістаў, запрошаных ва ўнівэрсытэт для правядзеньня сумоўяў, трое — грамадзяне Беларусі.
Цягам наступных тыдняў Пошукавая камісія і чальцы Кіроўнай рады пяройдуць да дбайнага разгляду вынікаў двух дзён сумоўяў і абмеркаваньняў. Пошук рэктара пераходзіць да наступнага этапу: праверкі рэкамэндацый, аналізу публікацый і выпрацоўкі пунктаў для абмеркаваньня ў рамках заключнага этапу ацэнкі кандыдатаў.
«Мы вітаем станоўчую ўвагу і падтрымку і выказваем удзячнасьць за шматлікія парады, якія мы атрымалі», — зазначыў у асобнай заяве старшыня Кіроўнай рады ЭГУ Дэніэл Таршыс.
