Падрабязнасьці правядзеньня выбарчай кампаніі 2015 году паведаміла старшыня ЦВК Лідзія Ярмошына.
Па яе словах, прэзыдэнцкая кампанія — ня самая дарагая. «Нашмат даражэй абыходзяцца мясцовыя выбары, калі нашмат больш кандыдатаў. Тым ня менш мы пастараемся, каб усё адбылося годна», — цытуе словы Ярмошынай БЕЛТА.
Лідзія Ярмошына таксама заявіла, што ЦВК арыентуецца на лічбу ў 15 кандыдатаў, бо «пераадолець бар’ер у 100 тысяч подпісаў» складана.
Ярмошына нагадала, што было прынятае заканадаўчае рашэньне адмовіцца ад радыёдэбатаў. Па словах старшыні ЦВК, «гэтае мерапрыемства было невідовішчным».
«Кандыдаты самі не прыходзілі на дэбаты, а пасылалі давераных асобаў. Мы палічылі, што на радыё дастаткова будзе выступаў, а радыёдэбаты не выконваюць сваіх функцыяў, якія яны змогуць выканаць пры відэашэрагу», — патлумачыла Ярмошына.
Гэтыя заявы Лідзія Ярмошына зрабіла на міжнароднай канфэрэнцыі «Выбарчыя працэсы на прасторы СНД», якая праходзіць у Менску.
