«Як ставіцца Міністэрства замежных спраў Беларусі да так званых выбараў, якія прайшлі 2 лістапада на тэрыторыі самаабвешчаных Данецкай і Луганскай народных рэспублік?». З такім пытаньнем карэспандэнт Свабоды зьвярнуўся сёньня да прэсавага сакратара зьнешнепалітычнага ведамства краіны Дзьмітрыя Мірончыка.
Адказ афіцыйнага прадстаўніка МЗС Беларусі быў наступны:
«Ніякіх камэнтароў з гэтай нагоды мы рабіць не плянуем».
Што тычыцца магчымага новага раўнду перамоўнага працэсу паміж прадстаўнікамі Ўкраіны і сэпаратыстамі пры ўдзеле АБСЭ і Расеі ў фармаце «менскіх кансультацыяў», то пакуль ніякіх навінаў на гэты конт у МЗС Беларусі няма.
«Тут усё залежыць непасрэдна ад удзельнікаў кансультацыяў і іх жаданьня правесьці чарговую сустрэчу», — заявіў Дзьмітры Мірончык.
