Нацыянальны гістарычны музэй датэрмінова зачыніў выставу, прысьвечаную 80-годзьдзю Саюзу беларускіх пісьменьнікаў. Адміністрацыя музэя тлумачыць гэта тэхнічнай неабходнасьцю. Пісьменьнікі, аб’яднаныя ў незалежны саюз, выказваюць расчараваньне.
Унікальная выстава абістых рэчаў вядомых беларускіх пісьменьнікаў, а таксама мастацкія фотапартрэты сяброў найстарэйшай пісьменьніцкай арганізацыі была адкрытая 27 лістапада і прысьвечаная 80-годзьдзю Саюзу беларускіх пісьменьнікаў. Выстава мела доўжыцца да 8 сьнежня, але зачынілася датэрмінова. Дырэктар музэю Алег Рыжкоў факт закрыцьця патлумачыў гэтак:
«Тут нейкае непаразуменьне з датай. Гэтая выстава была не заплянаваная паводле каляндарных плянаў. Мы не дамаўляліся, да якой даты яна мусіць працаваць, а паводле магчымасьці. Таму яна прапрацавала два тыдні, а сёньня тут мантажуецца плянавая выстава. Таму з нашага боку былі выкананыя ўсе дамоўленасьці».
Выстава ў гонар 80-годзьдзя Саюзу беларускіх пісьменьнікаў і прэзэнтацыя календара «Першапачатак» адбыліся пры падтрымцы Міністэрства культуры і Нацыянальнага гістарычнага музэю. Але ўдзелу ў імпрэзе адкрыцьця прадстаўнікі гэтых дзяржаўных устаноў ня бралі. Як паведаміў старшыня Саюзу беларускіх пісьменьнікаў Барыс Пятровіч, напачатку плянавалася пакінуць экспазыцыю да 15 сьнежня, затым скарацілі тэрмін да 8 сьнежня. А ў выніку выстава была зачыненая 3 сьнежня без папярэджаньня і тлумачэньня:
«Мы меркавалі, што выстава будзе працаваць да 8 сьнежня. Менавіта на гэтую дату мы арыентавалі тых, хто нам тэлефанаваў і хацеў пабачыць выстаўленыя экспанаты. Але мы выпадкова даведаліся, што выстава датэрмінова зачынілася. Здарылася гэта нечакана, бо нас ніхто не папярэджваў. Зараз мы забіраем экспанаты і вяртаем тым, хто нам іх даваў, гэта значыць Рыгору Іванавічу Барадуліну, Нілу Сымонавічу Гілевічу, Ірыне Міхайлаўне Быкавай. Тым ня менш, мы ўдзячныя музэю, што гэтая выстава адбылася».
Экспанаты выставы
У экспазыцыі выставы былі зьмешчаныя рэчы, якія належаць сем’ям пісьменьнікаў: дыпляматычны пашпарт Васіля Быкава, друкарка Рыгора Барадуліна, пісьмовы камплект Максіма Танка, арыгінал «Сказа пра Лысую гару» Ніла Гілевіча і многія іншыя рэдкія экспанаты.
Партрэт Рыгора Барадуліна
Паэт Генадзь Бураўкін, які прысутнічаў на ўрачыстасьці адкрыцьця, шкадуе, што ўнікальная выстава завершылася гэтак хутка:
«Шкада, бо выстава была вельмі цікавая, экспазыцыя складзеная вельмі добра. І былі рэчы, міма якіх прайсьці немагчыма чалавеку, які любіць нашую культуру, нашу літаратуру. Бо гэта зьвязана зь імёнамі і Быкава, і Брыля, і Танка. Я лічу, што ў такім музэі і пад такой рубрыкай — да 80-годзьдзя Саюзу беларускіх пісьменьнікаў, а не чаргінцоўскага — гэта крок вельмі і вельмі неблагі. А ведаючы нашую сытуацыю, я не хачу асуджаць. Магчыма, яны вымушаныя былі гэта зрабіць».
Партрэт Генадзя Бураўкіна ў выяве міфічнага героя-казачніка быў таксама зьмешчаны ў экспазыцыі выставы.
Партрэт Генадзя Бураўкіна
Партрэт яшчэ адзнаго сябра Саюзу беларускіх пісьменьнікаў, паэта Міхась Скоблы, на якім ён увасоблены ў міфічнага героя-лазьніка, там таксама можна было пабачыць. Пра закрыцьцё выставы Міхась Скобла кажа гэтак:
«Значыць, для кагосьці гэта дывэрсія — дыпляматычны пашпарт Быкава, рукапісы Ніла Гілевіча і Ўладзімера Караткевіча, выдатныя партрэты, на якіх Уладзімер Арлоў, Анатоль Вярцінскі. Зроблена вялікая праца, і шкада, што гэта толькі на тыдзень. Я б на месцы гэтага музэю пакінуў бы гэтую выставу ў пастаяннай экспазыцыі. Шкада, што так адбылося».
Тым часам кіраўніцтва Саюзу беларускіх пісьменьнікаў намерваецца працягнуць мастацкія імпрэзы, прэзэнтацыі і творчыя вечарыны, прысьвечаныя 80-годзьдзю СБП.
