Прадпрымальнікі страйкуюць

Магілёў. На рынку «Грабянёўскі» павільёны, якія гандлююць аддзеньнем, зачыненыя. Працуюць павільёны, дзе прадаюцца бытавая тэхніка, гаспадарчыя тавары, харчы. Прадпрымальнікі сабраліся каля адміністрацыі рынку і абмяркоўваюць свае праблемы.

Рынак «Віленскі» ў Магілёве таксама не працуе.

Касьцюковічы. Рынак страйкуе.

Баранавічы. Цэнтральны калгасны рынак і рынак каля вакзалу «Палескі» не працуюць.

Полацак. Прадпрымальнікі Калгаснага рынку ня выйшлі на працу.

Менск, Ждановічы. «Нехарчовы рынак», «Сьвет моды» і палаткі не працуюць.

Баранавічы. Прадпрымальнік Мікола Чарнавус кажа, што каля цэнтральнага рынку сабраліся каля 50 прадпрымальнікаў, яшчэ 30 пайшлі да гарвыканкаму, каб перадаць свае патрабаваньні.

«Яшчэ не заходзілі ў адміністрацыю, але міліцыя ўжо падцягваецца», — заявіў Чарнавус.

Менск. На Ждановічах сабралася некалькі сотняў прадпрымальнікаў, якія пратэстуюць супраць новых правілаў гандлю ў межах Мытнага Саюзу. З прадпрымальнікамі лідэр грамадзкага аб’яднаньня «Пэрспэктыва» Анатоль Шумчанка. Яны вырашаюць, які фармат страйк набудзе далей. Вакол шмат ахоўнікаў, міліцыянтаў.



Ад гандляроў ужо стала вядома, што адміністрацыя загадала перапісаць усіх гандляроў, якія ня выйшлі на працу ў так званы «чорны сьпіс», і што будзе з гэтымі, так бы мовіць, «сабатажнікамі», пакуль невядома.

А 14-й гадзіне на прыступках Міністэрства эканомікі Анатоль Шумчанка зьбіраецца наладзіць прэс-канфэрэнцыю і дагрукацца да чыноўнікаў, каб пераказаць ім пазыцыю прадпрымальнікаў наконт будучыні Мытнага саюзу. Іх пазыцыя такая, што Беларусі гэта ўтварэньне не патрэбна, бо яно стварае толькі дадатковыя цяжкасьці ў працы.

Магілёў. Акрамя рынку, страйкуюць усе гандлёвыя цэнтры. Не працуюць прадпрымальнікі, якія маюць месцы ў гандлёвых цэнтрах. У цэнтры "Магніт" прадпрымальнікі напісалі заявы адміністрацыі, што сёньня ня будуць працаваць. На 80% не працуе гандлёвы цэнтар "Панарама".

Горадня. На цэнтральным рынку аднадушша сярод прадпрымальнікаў няма. Ніжняя пляцоўка, дзе гандлююць рэчамі, цалкам пустая. Умовы тут дрэнныя: і летам, і ўзімку — пад паветкамі.

На верхняй пляцоўцы прадпрымальнікі маюць шапікі з ралетамі, дзе прадаецца той жа тавар, што й на ніжняй пляцоўцы — абутак, сподняе, бытавая хімія, касмэтыка. Большая частка «ралетчыкаў» на Цэнтральным не падтрымала страйк, хоць 16 чэрвеня яны ўдзельнічалі ў аднадзённай акцыі пратэсту.

Былі зачыненыя ралеты сёньня і на міні-рынках на вуліцах Паліграфістаў і Антонава. Толькі паасобныя гандляры не праявілі салідарнасьці са страйкоўцамі.

Гомель. Усе буйныя рынкі абласнога цэнтру не працуюць — «Прудкоўскі», «Цэнтральны», «Давыдаўскі», «Паркінг», «Сакрэт». Ёсьць некалькі, так бы мовіць, «штрэйкбрэхераў»-рэалізатараў, якія адкрылі свае палаткі і ралеты.

Горадня. На Цэнтральным рынку ніжняя пляцоўка цалкам не працуе. На верхняй пляцоўцы частка гандляроў адкрыла свае ралеты, але бальшыня не працуе. Тое самае і на міні-рынках, што па вуліцы Паліграфістаў і вуліцы Антонава. Большая частка гандлёвых павільёнаў зачыненая.

Баранавічы. Прадпрымальнік Мікола Чарнавус паведаміў Свабодзе: , у Баранавічах ня выйшлі на працу 1200 прадпрымальнікаў, не працуюць усе рынкі і шмат якія прыватныя гандлёвыя кропкі.

35 прадпрымальнікаў прыйшлі да гарвыканкаму, каб перадаць свае патрабаваньні. Да іх выйшла начальніца аддзелу эканомікі Раіса Ўласовіч.

«Ну што яна магла нам сказаць? Але яна сказала, што ў міністэрстве далі дабро і ёсьць папера, што яшчэ паўгода сэртыфікацыю ўводзіць ня будуць. Але што міністэрства вырашае, калі рашэньне прымалася ў Эўраазіяцкай камісіі?» — кажа спадар Чарнавус.

Каля паўгадзіны прадпрымальнікі пастаялі ля гарвыканкаму. Мікола Чарнавус трымаў плякат «Мы хочам працаваць». Да прадпрымальніка падышоў міліцыянт і папрасіў згарнуць плякат, бо могуць пакараць за несанкцыянаваную акцыю.

Ждановічы, Менск. Старшыня «Пэрспэктывы» Анатоль Шумчанка абвесьціў падчас кароткага мітынгу , што яны дамагліся, каб 2 ліпеня ў Маскву на паседжаньне Эўразійскай камісіі паехалі прадстаўнікі прадпрымальніцкага руху. Беларускія прадпрымальнікі будуць уздымаць паслабленьня ўмоваў працы для беларускіх гандляроў.

На мітынгу выступіла начальнік аддзелу гандлю Цэнтральнага раёну Менску Натальля Хмяльніцкая, яна прапанавала прадстаўнікам зацікаўленых структур сустрэцца 28 чэрвеня на рынку Ждановічы і абмеркаваць праблемы.

Віцебск. На рэчавым «Полацкім» кірмашы ня выйшлі толькі 40% прадпрымальнікаў.

На «Паўднёвым» кірмашы працуюць усе.

Гандляры тлумачаць свой няўдзел у акцыі пратэсту тым, што ў гэтым месяцы ў Віцебску ўжо быў адзін страйк, калі не працавалі блізу 95% прадпрымальнікаў, і тады пазыцыя наконт новых правілаў гандлю ў межах Мытнага зьвязу была ўжо прадэманстраваная.

Берасьце. Паводле падлікаў прадпрымальніцы Алены Кастус, на працу ня выйшлі каля 1300 прадпрымальнікаў.

«Не працуюць буйныя пункты — „Берасьцейскі пасаж“, рынак „Нікольскі“, рынак „Юбілейны“, рынак „Лагуна“, рынак „ЦУМ“ і Варшаўскі рынак. Я ўсе гэтыя рынкі аб’ехала — не працуюць», — заявіла Кустус.

Менск. Затрыманы лідэр «Пэрспэктывы» Анатоль Шумчанка, карэспандэнт Радыё Свабода Ігар Карней, карэспандэнт «Народнай Волі» Алесь Сівы і яшчэ два ці тры чалавекі. Яны ехалі з рынку Ждановічы ў гандлёвы цэнтар «Паркінг». Іх спынілі супрацоўнікі Савецкага РУУС сталіцы і павезьлі, хутчэй за ўсё, у пастарунак. Тэлефоны ўсіх затрыманых адключаныя. Пра гэта паведаміў Радыё Свабода прадпрымальнік Вячаслаў Піліпчук.

Ігар Карней паведаміў праз смс: Забралі ў Цэнтральны РУУС Менска.

Ігар Карней напісаў, што зь ім разам Алесь Сівы з «Народнай Волі», Натальля Касьцюковіч з tut.by і Анатоль Шумчанка.

Гомель. Страйкуюць рынкі Цэнтральны, Прывакзальны, Прудкоўскі

Івацэвічы. Прадпрымальнікі рэчавага рынку на працу ня выйшлі, працуе толькі кіёск насеньняў «Палісад».

Анатолю Шумчанку пры затрыманьні сказалі, што ён затрыманы па падазрэньні ў зьдзяйсьненьні злачынства. Пакуль міліцыя высьвятляе асобы, — піша Ігар Карней у смс з Цэнтральнага РУУС.

«Мы прыехалі з Шумчанкам у «Паркінг». Яго пасьвілі. Узялі без разбору», — праведамляе Карней.