Віцебскага актывіста Кансэрватыўна-хрысьціянскай партыі БНФ Сяргея Каваленку асудзілі паводле абвінавачаньня ў хуліганстве.
Замест прызначанай на пачатку судзьдзі Натальлі Карабліной сёньня працэс вяла судзьдзя Першамайскага раённага суду Віцебскe Валянціна Кісьмярожкіна.
Залю ахоўвалі міліцыянты ў форме. Яшчэ да пачатку суду ў самой залі было больш за 20 чалавек — міліцыянтаў у форме і людзей у цывільным. Іншых людзей у залю пусьцілі толькі пасьля таго, як яны пачалі пагражаць паскардзіцца старшыні суду. Каваленка запатрабаваў, каб працэс вёўся на беларускай мове. Судзьдзя адмовіла, сказала, што прысутнічае перакладчык. У суд прыехаў адвакат Каваленкі.
Увечары 25 сакавіка актывіста затрымалі, абвінавацілі ў пераходзе дарогі ў неналежным месцы і аштрафавалі. У пратаколе напісана, што Каваленка ішоў па праезнай частцы вуліцы 2-ая Прадольная. Гэта заўважыў міліцэйскі патруль, пад'ехаў на машыне, зрабіў заўвагу. І нібыта Каваленка ў нецэнзурнай форме адмовіўся сысьці на ходнік. Тады яго затрымалі нібыта за хуліганства. Гэта пацьвярджаюць сьведкі – супрацоўнікі патрульна-паставой службы Першамайскага раёну Аляксей Новікаў і Аляксандар Давыдоўскі. Яны кажуць, што падчас размовы з Каваленкам зьвярнулі ўвагу на пах алькаголю.
У сваім выступе адвакат Аляксандар Галіеў папрасіў суд спыніць працэс і скасаваць адміністрацыйную справу супраць Каваленкі. Бо лічыць, што сведчаньні міліцыянтаў супярэчлівымі. А таксама зазначыў, што лекар- эксперт з упэўненасцю ня можа засьведчыць нецвярозасць Сяргея.
Каваленку павезьлі на мэдычнае асьведчаньне — праверыць на наяўнасьць алькаголю ў крыві. Сьведка Аляксандар Лебедзеў, доктар псыхіятр-нарколяг кажа, што Каваленка праходзіў тэст адмовіўся. Але, паводле Лебедзева, пах алькаголю адчуваўся. Экспэрт сказаў, што ў Сяргея Каваленкі была цьвердая паходка, што ён паводзіў сябе адэкватна, а пачырванелы твар мог быць прыкметай падвышанага ціску, або таго, што ён быў напружаны і хваляваўся. Але паводзіў сябе адэкватна, ніякіх праяваў хуліганскіх паводзінаў не было.
Сяргея Каваленку абвінавацілі ў дробным хуліганстве. На яго склалі пратакол за брыдкаслоўе і за тое, што ён «размахваў рукамі».
Ноч з 25 на 26 сакавіка Каваленка правёў у ізалятары часовага ўтрыманьня. Назаўтра, пасьля абвяшчэньня перапынку ў судзе, актывіста адпусьцілі з-пад варты.
Паводле жонкі апазыцыянэра Алены Каваленкі, некалькі дзён перад затрыманьнем каля іхнага дому дзяжурылі незнаёмыя машыны.
