У сьпісе тры жанчыны — дзьве зь іх прадстаўлялі Чэхію ў Эўрапарляменце — гэта журналістка Яна Бабошыкава і доктарка Зузана Ройтава. Трэцяя — акторка Таня Фішэрава. З асобаў, вядомых і ў Беларусі, вызначаецца міністар замежных спраў Карэл Шварцэнберг. Паводле апошніх апытаньняў грамадзкай думкі, лідэрамі ў лесьвіцы папулярнасьці сярод зарэгістраваных кандыдатаў застаюцца два былыя прэм’еры — Ян Фішэр і Мілаш Зэман.
Самы дзіўны і знакаміты за межамі Чэхіі кандыдат на выбарах — татуяваны на 90% цела Уладзімір Франц. Франц зьяўляецца прафэсарам катэдры сцэнічнай музыкі пражскай тэатральнай акадэміі. Ён кампазытар і мастак.
Дагэтуль чэскі прэзыдэнт абіраўся парлямэнтам на сумесным пасяджэньні яго абедзьвюх палат. Магчымае ўвядзеньне выбараў прэзыдэнта народам доўга абмяркоўвалася і ўрэшце было ухвалена сёлета. Выбары прэзыдэнта паводле новага заканадаўства Чэхіі будуць праходзіць у двух колах. Пераможцам стане кандыдат, які ў першым коле атрымае больш як палавіну галасоў. Калі такога ня будзе, два найбольш пасьпяховыя кандыдаты працягнуць змаганьне ў другім коле.
За чэскімі прэзыдэнцкімі выбарамі акрамя БДІПЧ АБСЭ назірае група з сарака беларускіх назіральнікаў. Місія праходзіць у межах праекту «Назіраньне за выбарамі: тэорыя і практыка» пры падтрымцы недзяржаўнай арганізацыяй Belarus Watch. У склад назіральнай групы ўвайшлі прадстаўнікі беларускіх недзяржаўных арганізацыяў, партыяў, студэнты і выкладнікі ЭГУ.
Назіральнікі зь Беларусі будуць сачыць за хадой галасаваньня і падлікам галасоў, наколькі адпавядаюць яны чэскім і міжнародным стандартам. Як паведаміла кіраўніца місіі Анастасія Матчанка, назіральнікі наведаюць каля 100 выбарчых участкаў у розных рэгіёнах краіны. Па выніках назіраньня будзе падрыхтаваная папярэдняя і выніковая справаздача.
