Сяргей Чалы: «Кацарэнка стаў ахвярай фінансавага крызісу»

Кіраўніка «Тэхнабанку» Ўладзіслава Кацарэнку абвінавачваюць у шэрагу эканамічных злачынстваў, у тым ліку, як вынікае са словаў старшыні Сьледчага камітэту Валера Вакульчыка, у незаконных валютных апэрацыях. Вінаватым банкір сябе не прызнае, але сьледчыя бяруцца завяршыць ягоную справу да канца году, кажа спадар Вакульчык.

Старшыня назіральнай рады «Тэхнабанку» Ўладзіслаў Кацарэнка быў арыштаваны ў сваім кабінэце сёлета ў сакавіку. Хутка зьявілася вэрсія, што Кацарэнка мог быць датычны да валютных апэрацыяў, з дапамогай якіх бізнэсоўцы куплялі і прадавалі валюту па выгадным курсе падчас леташняга фінансавага крызісу, калі спачатку валюты ў свабодным продажы не было, а потым яна падаражэла ўтрая. Зараз гэтая вэрсія знаходзіць пацьверджаньне.

Але ці вінаватыя банкіры ў тым, што дзяржава не змагла ўтрымаць рубель і забясьпечыць свабодны продаж валюты? Незалежны эканаміст Сяргей Чалы мяркуе, што Ўладзіслаў Кацарэнка стаў ахвярай фінансавага крызісу 2011 году, які здарыўся зь віны дзяржавы:

«Калі вы ствараеце такую сытуацыю, што рынак фактычна закрыты, людзі ня хочуць здаваць валюту па вашым курсе, а іншага няма, чэргі велізарныя і шанцаў набыць валюту ў іх няма, міжбанк закрыты таксама і ўсе стаяць толькі ў адзін бок, то відавочна, што знаходзіліся тыя, хто забясьпечыў попыт на валюту. Згадайма пра сайт prokopovi.ch, які таксама зьявіўся як адказ на тое, што ў людзей зьнікла простая магчымасьць набыць валюту».

Сайт prokopovi.ch зьявіўся ў красавіку. Зь яго дапамогай людзі маглі дамовіцца пра абмен валюты на рублі па рэальным курсе. Між тым ужо ўлетку міліцыя пачала затрымліваць і штрафаваць тых, хто спрабаваў зладзіць абмен у абыход банкаў. Толькі ў канцы лета дзяржава пайшла на тое, каб абясцэніць рубель амаль утрая, фактычна панізіўшы курс да ўзроўню чорнага рынку. Але вынікам гэтага сталася тое, што ў абменьніках зьявіліся даляры і курс стабілізаваўся.

У інфармацыі пра справу Кацарэнкі фігуруе сума прыкладна ў 1 мільён даляраў, якую яму нібыта перадалі. Назіральнікі лічаць гэта ўскосным доказам, што былы банкір дапамагаў у абмене валюты менавіта фізычным асобам.