Украінскія сьледчыя ўстанавілі, што адзіным замоўнікам забойства журналіста Георгія Гангадзэ ў 2000 годзе быў колішні міністар унутраных справаў Украіны Юрый Краўчанка.
Паводле вэрсіі забойства, рэканструяванай сьледчай групай Генэральнай пракуратуры Ўкраіны, міністар Краўчанка 13 або 14 верасьня 2000 году ў сваім кабінэце ў Кіеве выдаў вусны загад забіць Гангадзэ генэралу Аляксею Пукачу, начальніку Галоўнай управы крымінальнага вышуку МУС Украіны.
Гангадзэ, які кіраваў інтэрнэт-выданьнем "Украінская праўда", дзе зьмяшчаў крытычныя матэрыялы ў адрас адміністрацыі Леаніда Кучмы, быў выкрадзены 16 верасьня 2000 году па дарозе з працы дадому ў Кіеве Пукачам і трыма іншымі супрацоўнікамі МУС — Паповічам, Пратасавым і Кастэнкам. Гангадзе быў забіты, як устанавіла сьледзтва, дзясяць хвілін па поўначы 17 верасьня. Цела Гангадзэ было пахаванае ў лесе каля Кіеву, а потым, на просьбу міністра Краўчанкі, перапахаванае Пукачам у кастрычніку. Падчас перапахаваньня Пукач сякерай аддзяліў галаву ад цела і закапаў яе ў іншым месцы.
Абезгалоўленае цела журналіста было знойдзенае 2 лістапада 2000-га.
1 сакавіка 2005 году прэзыдэнт Віктар Юшчанка афіцыйна заявіў, што забойцы Гангадзэ затрыманыя. 3 сакавіка тагачасны генэральны пракурор Сьвятаслаў Піскун заявіў, што пракуратура на наступны дзень мяркуе дапытаць былога кіраўніка МУС Краўчанку. Але допыт не адбыўся. 4 сакавіка 2005 году Краўчанка быў знойдзены мёртвым на сваёй дачы пад Кіевам, з дзьвюма ранамі ад стрэлу ў галаву. Паводле сьледзтва, былы міністар пакончыў жыцьцё самагубствам.
15 сакавіка 2008 году суд пакараў трох абвінавачаных у забойстве Гангадзэ турэмнымі тэрмінамі: Мікалай Пратасаў атрымаў 13 год, а Валерый Кастэнка і Аляксандар Паповіч па 12 год.
У чэрвені летась украінскім праваахоўнікам удалося арыштаваць Аляксея Пукача.
10 верасьня 2010 Генэральная пракуратура Ўкраіны афіцыйна закончыла сьледзтва ў справе Гангадзэ.
