Што для вас свабода?
Свабода, калі можаш не баяцца выказываць сваю пазыцыю і крытычныя меркаваньні пра ўладу, можаш свабодна езьдзіць і жыць у іншай краіне, практычна ўплываць на выбары і дзейнасьць існуючай улады, маеш права на недатыкальнасьць законнай уласнай маёмасьці, калі жывеш у краіне, дзе існуе незалежная законадаўчая, судовая і выканаўчая ўлады.
Што найбольш абмяжоўвае вашу свабоду?
Праезд і побыт у Беларусі.
Што для вас шчасьце?
Шчасьце, калі ты задаволены жыцьцём, цэніш кожны пражыты дзень, калі блізкія людзі цябе разумеюць і цэняць, а чужыя паважаюць, калі дасягаеш пастаўленай мэты.
Чаго вы найбольш баіцеся?
Расчараваньня ў сваіх ідэалах і ў блізкіх па духу сябрах.
Які талент вы хацелі б мець?
На жаль, таленту ня маю, але прыстойнасьць і добрасумленьне павінен захаваць на ўсё жыцьцё.
Кім з сучасьнікаў вы захапляецеся?
Шмат ёсьць цікавых пісьменьнікаў, грамадзкіх дзеячаў і палітыкаў, але выдзяліць хачу Радзіма Гарэцкага і Генадзя Бураўкіна.
Што вы найбольш любіце рабіць?
Вырашаць праблемы Таварыства беларускай культуры, сачыць за падзеямі ў Беларусі і сьвеце, чытаць кнігі.
Калі б можна было пражыць жыцьцё яшчэ раз, што б вы зьмянілі?
Жыцьцёвы лёс быў да мяне прыхільны, таму мяняць нічога не хацеў бы.
Якую найлепшую параду вы атрымалі?
Разьлічваць на свае сілы і магчымасьці. Прымаць адказнасьць за свае рашэньні.
Які ваш улюбёны дэвіз?
Жыве Беларусь !
У якой палітычнай сыстэме вы хацелі б жыць?
У цывілізаванай капіталістычнай дэмакратычнай сыстэме.
У якой краіне вы хацелі б жыць?
Задавальняе Літва з частым наведваньнем Беларусі.
У якую эпоху вы хацелі б жыць?
Сучасная эпоха вельмі цікавая.
Калі б вы сталі кіраўніком Беларусі, што б зрабілі найперш?
Даў бы магчымасьць пачаць беларусізацыю насельніцтва краіны, каб замест савецкага стварыўся беларускі народ.
Якія адносіны Беларусь павінна мець з Эўразьвязам?
Беларусь павінна стаць сябрам Эўразьвязу.
Якія адносіны Беларусь павінна мець з Расеяй?
З Расеяй трэба наладзіць нармальныя цывілізаваныя добрасуседзкія адносіны на ўзаемавыгаднай эканамічнай аснове.
Некаторыя думаюць так: «Хай дыктатура, абы свая». А Вы?
Дыктатура ў наш час непрымальная. Асабістая ўлада парушае нармальны лад жыцьця і прыводзіць да ігнараваньня цывілізаваных чалавечых законаў, зьніжае дабрабыт народа.
Калі і як у Беларусі зьменіцца ўлада?
Адзінага рэцэпту зьмены дыктатуры няма. (Гітлер, Сталін, Мілошэвіч і інш.)
Эканамічны фактар, суседнія краіны, акружэньне кіраўніка паказвае, што такая зьмена можа адбыцца даволі хутка.
Калі беларусы загавораць па-беларуску?
Калі зьменіцца антыбеларускае кіраўніцтва — пытаньне мовы вырашыцца само сабою.
Што будзе, калі беларусы не загавораць па-беларуску?
Калі беларусы не загавораць па беларуску, то Беларусь перастане існаваць як дзяржава, а народ як нацыя.
