ФОТАРЭПАРТАЖ
У парадзе ўдзельнічалі прадстаўнікі арганізацыі па абароне правоў сэксуальных меншасьцяў Беларусі, Расеі і Аўстраліі. Ёсьць зьбітыя. Двое затрыманых папрасілі аказаць ім мэдычную дапамогу, але міліцыянты Першамайскага РУУС адмовілі ім у гэтым.
У міліцыі Першамайскага раёну Менску знаходзяцца грамадзяне Расеі і Беларусі. Яны ўсе казалі, што былі гатовыя да разгону акцыі. Кожны з удзельнікаў “Славянскага гей-параду 2010” меў пры сабе заяву, у якой было напісана на імя кіраўніка міліцыі, што затрыманы прызнае сябе парушальнікам Адміністрацыйнага кодэксу Рэспублікі Беларусь і таму просіць ужыць да яго мінімальны штраф.
Арганізатары плянавалі правесьці акцыю а 13-й гадзіне, але перад тым патэлефанавалі журналістам і папрасілі пачакаць. Арганізатары патлумачылі затрымку тым, што іх паўсюль суправаджаюць міліцыянты, каб ня даць правесьці акцыю.
Нарэшце на вуліцы Сурганава недалёка ад інстытуту матэматыкі зьявіліся дэманстранты. Ім насустрач кінуліся журналісты і спэцназаўцы.
Ігар Іваноў 13 гадоў жыве ў Лёндане. Ён упершыню ўдзельнічаў у гей-парадзе ў Беларусі:
Тут няма ніякіх законаў, якія б абаранялі двух мужчын ці кабет ...
“Гэта вяртае на зямлю. Папросту ў Лёндане гэта вялікае сьвята. Тут няма роўных правоў і сацыяльнай абароненасьці для геяў і лесьбіянак. Тут я баюся, бо, калі б я вырашыў са сваім хлопцам пайсьці ў гатэль, то яны маглі б мяне папросту паслаць... Тут няма ніякіх законаў, якія б абаранялі двух мужчын ці кабет, якія жывуць разам, каб іх не прагналі з кватэры, якую яны арандуюць... Гэта вельмі важна – мець абарону і адчуваць сябе спакойна”.
Мікалай Аляксееў прыехаў з Расеі:
“Нас прыехала шмат з Расеі, каб падтрымаць нашых калегаў у Беларусі і дапамагчы ім правесьці гей-парад”.
Яму не далі дагаварыць, бо ў гэты час пачаўся разгон акцыі. Спэцназаўцы пачалі выхопліваць сьцягі колеру вясёлкі, а дэманстрантаў закідваць у міліцэйскія машыны.
Марыя Яфіменкава прыехала ў Менск з Санкт-Пецярбургу. На яе вачах брутальна цягнулі ў машыны ўдзельнікаў акцыі:
“Вы бачылі, як цяпер па-барбарску затрымалі людзей. Вырвалі ў іх сьцягі. Гэта беззаконьне. Мы якраз супраць гэтага і пратэстуем.
Гэта мой першы прайд. Я, вядома, у шоку, але гэтага й трэба было чакаць. Мы жывем у рэпрэсіўных краінах. Я маю на ўвазе і Расею, і Беларусь. Нам базавыя палітычныя правы не даюць магчымасьці рэалізоўваць”.
Некалькі чалавек, якім удалося пазьбегчы затрыманьняў, адышлі да будынку міжнароднага факультэту БДУ.
Сярод іх студэнт гарадзенскага ўнівэрсытэту імя Янкі Купалы Ігар Ціханюк:
"Я ў шоку. Некалькі разоў мянялі месца правядзеньня акцыі. За намі сачылі, нам перакрывалі шматлікія аб'екты. Мы езьдзілі па горадзе і шукалі, дзе б можна было правесьці акцыю. Яны за намі сачылі, праслухоўвалі нашы тэлефоны і не хавалі гэтага”.
Сябра Ігара, які назваў сябе транссэксуалам, дадаў:
“Мы так і думалі, што нам не дадуць правесьці акцыю. Гэта ня дзіўна. У мяне праблемы заўсёды. Даволі часта зьбіваюць. Асабліва “скіны”. Часта даводзіцца мець дачыненьні зь міліцыяй. Нам кажуць, што нас не павінна быць тут дый увогуле ў сьвеце. Што мы сьмецьце, і ўсё такое”.
Ігара зь сябрам схапілі і пацягнулі ў машыну. Тым часам з аўтобуса выбеглі спэцназаўцы і схапілі маладога чалавека, які толькі пасьпеў крыкнуць, каб яму не білі акуляраў. Зь ім была жанчына:
“Не чапайце яго!!! Ён быў са мной! Мы міма ішлі! Ён сябра майго сына. Ён да нас прыехаў зь Вільні. Ён наш госьць! Ідзем, бачым – журналісты. Я сама яму сказала: “Давай паглядзім. Цікава”. Чуем, як міліцыянты кажуць і кажуць: “Підарасы”. Кажу: “Давай паглядзім, што тут такое”. Толькі спыніліся, як яны раптам схапілі Ўладзю. Што ж гэта робіцца!?”
У міліцыі Першамайскага раёну Менску двое затрыманых папрасілі аказаць ім мэдычную дапамогу. Адзін хлопец быў вельмі моцна зьбіты. Ён паведаміў “Свабодзе”, што ў яго шматлікія пабоі. Правая рука яго павісла, і ён казаў, што, магчыма, у яго пералом. Другі хлопец сядзеў на падлозе. Ён казаў, што ў яго пухліна, а пасьля таго, як атрымаў некалькі моцных удараў, стаў кепска сябе адчуваць.
У дзяжурнай частцы праігнаравалі просьбы затрыманых. Яны сказалі, што выклікаюць хуткую толькі пасьля таго, як дапытаюць затрыманых.
