Што для вас свабода?
Дыханьне. Яго не адсочваеш. Бо ўсё ў арганізьме працуе зладжана, і дыханьне — часьціна гэтага зладу. Роўна ж і наадварот: рэзрух замінае дыханьню, альбо цяжкае дыханьне спараджае безладзь у целе.
Што найбольш абмяжоўвае вашу свабоду?
Пякельнае ўсьведамленьне несвабоды ў самых элемэнтарных праявах асабовасьці. Самаабмяжоўваньне, выбудова самасупынаў спыняе натуральную плынь жыцьця й нявечыць саму сутнасьць пабытаваньня ў сьвеце, дзе ўсё адпачатна адкрыта да пазнаньня.
Што для вас шчасьце?
Любіць. Аддаваць і ведаць, што табой аддаванае прымаюць.
Чаго вы найбольш баіцеся?
Зрабіцца нямоглай і ўзлавацца на лёс.
Які талент вы хацелі б мець?
Таньчыць і сьпяваць. Падаецца, гэта й ёсьць пачуваньнем існай волі.
Кім з сучасьнікаў вы захапляецеся?
Не ствараю ідалаў. Люблю ў кожным, цікавым мне, чалавеку ягоную ўнікальнасьць. Зачароўваюся талентамі.
Што вы найбольш любіце рабіць?
Думаць. А таксама новаствараць прастору — дызайнаваць кожны кут, што даецца да рук.
Калі б можна было пражыць жыцьцё яшчэ раз, што б вы зьмянілі?
Спаткалася б з Ларысай Геніюш (я расла непадалёк ад ейнай Зэльвы). Шукала б мудрасьць ня рваць жывых ніцін доранага Богам супольля.
Якую найлепшую параду вы атрымалі?
Не прасі дазволу — дазваляй сама.
Які ваш улюбёны дэвіз?
Om shanti. Я — спакойная душа.
У якой палітычнай сыстэме вы хацелі б жыць?
Хай Бог зьлітуецца й збавіць ад сыстэм усялякіх. Адна толькі сыстэма жыцьцядайная — прырода ўсярэдзіне мяне і ў Сусьвеце.
У якой краіне вы хацелі б жыць?
На Месцы Сілы — у мроенай мной і сьнёнай Беларусі, з праўдзівым імём і шляхам.
У якую эпоху вы хацелі б жыць?
У эпоху Дыямэнтавай дарогі, якая кожнага выводзіць да Сябе.
Калі б вы сталі кіраўніком Беларусі, што б зрабілі найперш?
Ператварыла б кіраўніцтва ў СУ-творчасьць з Вышнім і ўсімі Талентамі краіны. (Калі б на тое стала мне мудрасьці й духовай моцы…)
Якія адносіны Беларусь павінна мець з Эўразьвязам?
Стасункі разумнай клеткі з Цэласьцю.
Якія адносіны Беларусь павінна мець з Расеяй?
Вольныя ад векавой маны й састарэлай гульні ў старэйшых-малодшых.
Некаторыя думаюць так: «Хай дыктатура, абы свая». А Вы?
Дыктатуры не ўласьціва СВАЯцкасьць. Дыктат заўсёды — чужая сярмяжка цяжка.
Калі і як у Беларусі зьменіцца ўлада?
Улада не зьмяняецца, бо яна таго аніколі не зажадае. Уладу мяняюць тыя, хто гатовы мець над сабой уладароў. Усялякая ж падуладнасьць — парушэньне законаў усяленскага Быцьця. Я дык гадую ў сабе спакваля давер да Гаспадара дзяржавы. Якога пакуль і блізка не відно…
Калі беларусы загавораць па-беларуску?
Калі ўсё беларускае перастане ўспрымацца анамаліяй, экзотыкай. ПРЫЖЫВЕЦЦА. І тады… не беларускія паэты, гісторыкі ці яшчэ каторыя адмыслоўцы (зь якіх нетраў узяліся?) загавораць да людзтва, а папросту Свае, Нашы. Ня штучныя, але ШТУКАваныя. Адзінкавыя.
Што будзе, калі беларусы не загавораць па-беларуску?
А беларусы й цяпер не гавораць па-беларуску. Ад нацыянальнага Дрэва адшчэплена крона, і толькі адна моцная галінка трывае на камлі. Ды ўсё-ткі… карані жывыя. Сілкуюць і тую нязломную галінку, і крону, падвіслую над прорвай нябыту. Гэтак памаўчым яшчэ адно да аднаго, пагаворым разнамоўна. Перад расстаньнем?.. Перад зьяднаньнем? Перад дзядамі й нашчадкамі. І, мабыць, схамянемся…
