У Ванкувэры адкрыліся XXI зімовыя Алімпійскія гульні

13 люты 2010, 14:37

Радыё Свабода

А 21 гадзінае паводле мясцовага часу (а 7 гадзіне раніцы 13 лютага паводле менскага) алімпійскі агонь у Ванкувэры --> http://maps.google.com/maps/ms?f=q&source=s_q&hl=en&geocode=&q=vancouver&ie=UTF8&oe=UTF8&msa=0&msid=116269108623372978886.00047e184b52131aa4e68&sll=49.263588,-123.138565&sspn=0.116572,0.256119&z=11 запалілі адразу чатыры выбітныя канадзкія спартсмэны: хакеіст Уэйн Грэцкі, баскетбаліст Стыў Нэш, гарналыжніца Нэнсі Грын і канькабежка Катрына Лемэй-Доўн.

Прэзыдэнт Міжнароднага алімпійскага камітэту Жак Роге адзначыў у сваім выступе, што пасьля Манрэаля і Калгары Канада ў трэці раз прымае Алімпійскія гульні. Паводле яго слоў, Алімпіяда — гэта больш, чым спартыўныя спаборніцтвы. Роге заявіў, што «сёньня, як ніколі, нам не хапае міру, брацтва і цярпеньня», аднак Гульні ў Ванкувэры праходзяць «у атмасфэры міру і веры ў алімпійскія ідэалы». Кіраўнік МАК падкрэсьліў, што слава накладае адказнасьць, і заклікаў спартсмэнаў «адмовіцца ад допінгу і падману».

Афіцыйны беларускі сьцяг на цырымоніі адкрыцьця нёс нападаючы хакейнай зборнай і мінскага «Дынама» Алег Антоненка. Яго партнэр па клюбе, капітан каманды Віле Пелтанэн нёс сьцяг фінскай дэлегацыі.

Cьцяг на цырымоніі адкрыцьця нёс нападаючы хакейнай зборнай і мінскага «Дынама» Алег Антоненка.

Гледачы стоячы віталі каманду Грузіі, якая выйшла на парад з жалобнымі павязкамі: падчас трэніроўкі на трасе ва Ўістлеры загінуў 21-гадовы саначнік Надар Кумарыташвілі. Ён урэзаўся ў бэтонны слуп, страціўшы кіраваньне на хуткасьці 145 км/г. Удзельнікі цырымоніі адкрыцьця Алімпіяды ўшанавалі яго памяць хвілінай маўчаньня.

Каманда Грузіі выйшла на парад з жалобнымі павязкамі.

Надар Кумарыташвілі ўрэзаўся ў бэтонны слуп, страціўшы кіраваньне на хуткасьці 145 км/г.

Да 28 лютага 2.636 спартсмэнаў з 82 краін разыграюць 86 камплектаў узнагарод у 15 дысцыплінах. Беларусь будзе прадстаўлена 50 алімпійцамі ў шасьці відах (хакеі, біятлёне, фрыстайле, лыжных гонках, горных лыжах, канькабежным спорце).

У першы дзень Алімпіяды 13 лютага будзе разыграна шэсьць камплектаў узнагарод (у біятлёне, горных лыжах, канькабежным спорце, санным спорце, фрыстайле, шорт-трэку). Беларускія біятляністкі возьмуць удзел у спрынтэрскай гонцы на 7,5 км (пачатак а 23:00 паводле менскага часу). Найбольшыя надзеі ўскладаюцца на Дар’ю Домрачаву, паведамляе БелаПАН.