Па выніках падліку больш як 99% бюлетэняў лідэр апазыцыйнай Партыі Рэгіёнаў Віктар Януковіч перамагае з адрывам больш за 3%. Сама Юлія Цімашэнка пакуль не рабіла афіцыйных заяваў пасьля абвяшчэньня вынікаў галасаваньня, але чальцы яе партыі не хаваюць сваіх намераў аспрэчыць як рэгіянальныя, так, магчыма, і агульныя вынікі выбараў. Намесьніца старшыні Блёку Юліі Цімашэнкі Алёна Шусьцік паведаміла, у прыватнасьці, што яе партыя зьбіраецца сьпярша запатрабаваць перападліку галасоў на пэўных участках, а затым зьвяртацца ў суды.
Пад час выбарчай кампаніі Цімашэнка неаднаразова закідала свайму апанэнту намеры скрасьці перамогу. Міжнародныя назіральнікі, аднак, станоўча ацэньваюць празрыстасьць выбараў. Амбасада Злучаных Штатаў у Кіеве агучыла сёньня заяву, у якой выбары названыя кансалідацыяй дэмакратыі ў краіне. Тым часам прэзыдэнт Расеі Дзьмітры Мядзьведзеў павіншаваў Януковіча з "завяршэньнем выбарчай кампаніі, якая атрымала высокую ацэнку міжнародных назіральнікаў і з посьпехам дасягнутым на прэзыдэнцкіх выбарах".
