З гэтай нагоды намесьнік кіраўніка МЗС Літвы Жыгімантас Павілёніс вітаў у Вільні прадстаўнікоў Беларусі, а таксама Гішпаніі і Румыніі, які таксама атрымалі аналягічны статус, падае сайт літоўскага замежнапалітычнага ведамства.
На сустрэчы, якая ладзілася ў гонар пачатку старшынства Літвы ў РДБМ , спадар Павілёніс прадставіў сябрам і назіральнікам арганізацыі асноўныя прыярытэты літоўскага старшынства: інавацыі, транспамежнае супрацоўніцтва, сумесныя дзеяньні ў галіне бясьпекі і экалёгіі.
Павілёніс выказаў упэўненасьць, што Беларусь цяпер будзе шырэй супрацоўнічаць з краінамі балтыйскага рэгіёну.
На сустрэчы падкрэсьлівалася, што балтыйскія дзяржавы надаюць вялікае значэньне каапэрацыі з краінамі-назіральніцамі, асабліва ў такіх напрамках, як барацьба з гандлем людзьмі, правы дзяцей, радыелягічная і ядзерная бясьпека ў рэгіёне.
Старшынства Літвы ў РДБМ пачнецца 1 ліпеня 2009-га і скончыцца 30 чэрвеня 2010 году.
Рада дзяржаў Балтыйскага мора была створана ў 1992 годзе.
Цяпер у яе склад уваходзяць 11 краін: Данія, Ісьляндыя, Латвія, Літва, Нарвэгія, Нямеччына, Польшча, Расея, Фінляндыя, Швэцыя, Эстонія. Статус назіральнікаў маюць Беларусь, Вялікабрытанія, Гішпанія, ЗША, Італія, Нідэрлянды, Румынія, Славаччына, Украіна і Францыя.
