Апазыцыйны палітык расказаў “Свабодзе”:
“Сёньня я сустрэўся з кіраўніком першага аддзелу Генэральнай пракуратуры спадаром Івановым. Ён уручыў мне пастанову аб спыненьні крымінальнага перасьледу па маёй крымінальнай справе, а таксама ўведамленьне аб спыненьні папярэдняга расьсьледваньня крымінальнага перасьледу.Зь іх я даведаўся, што 3 лютага сьледчы па асабліва важных справах пракуратуры Менску спадар Агафонаў разьгледзеў дзьве мае справы і спыніў іх”.
Першая справа была ўзбуджана 27 лістапада 2001 году за артыкул, надрукаваны ў газэце “Народная воля”, другая –1 сакавіка 2004 году за інтэрвію праграме Мікалая Сванідзе “Люстэрка” на расейскім канале РТР. Апазыцыйнага палітыка абвінавацілі ў распаўсюдзе наўмысна хлусьлівых зьвестак пра прэзыдэнта Рэспублікі Беларусь.
Менавіта на падставе ўзбуджаных крымінальных справаў Анатолю Лябедзьку быў спынены выезд за межы краіны.
