“Відавочна, што гэта робіцца дзеля таго, каб сьцішыць грамадзкі рэзананс ад акцыі, якая адбывалася 1-га траўня. Нагадаю, у гадавіну далучэньня 10 краін Эўропы да Эўрапейскага Зьвязу актывісты дэмакратычнага руху праводзілі каля Нацыянальнай бібліятэкі акцыю “Дзень Эўропы”. З мірнымі лёзунгамі, пад эўрапейскімі сьцягамі людзі былі жорстка затрыманыя, сьцягі парваныя і канфіскаваныя. Прадстаўнікі краін Эўропы вельмі абураліся тым, як абышліся ўлады Беларусі з зарэгістраванай сымболікай Эўразьвязу. Мяркую, таму адразу і не судзілі ўсіх затрыманых, якіх было некалькі дзесяткаў, а вырашылі вось так разьбірацца, пазьней. Таму цяпер выносяцца завочныя прысуды. Мяне, як і Артура Фінькевіча, на суд нават не запрасілі. Застаецца чакаць першага новага затрыманьня, каб адсядзець гэтыя 7 сутак арышту”, -- заявіў Дашкевіч Свабодзе
Былы палітвязень Зьміцер Дашкевіч у канцы 2006-га года быў асуджаны на паўтара года зьняволеньня за ўдзел ў незарэгістраванай арганізацыі і адбыў у Шклоўскай калёніі год і 5 месяцаў.
