Суд Маскоўскага раёну Менску аштрафаваў пастара царквы “Новае жыцьцё” Вячаслава Ганчарэнку на мільён семсот тысяч рублёў — нібыта за парушэньне правілаў збору подпісаў грамадзянаў і за невыкананьне прадпісаньня пракурора.
Вячаслаў Ганчарэнка ў судзе тлумачыў, што грамадзяне ў Менску і ў рэгіёнах добраахвотна ставілі подпісы пад зваротам у Канстытуцыйны суд за тое, каб былі ўнесеныя зьмены ў закон аб рэлігіі і ў Адміністрацыйны кодэкс Рэспублікі Беларусь.
Пад зваротам падпісаліся ня толькі вернікі пратэстанцкіх суполак, але й іншыя грамадзяне. Усяго было сабрана больш за 50 000 подпісаў. 22 красавіка Паўла Севярынца, які быў сярод тых, хто адносіў сабраныя подпісы ў Канстытуцыйны суд, пакаралі штрафам на 40 базавых велічыняў (гэта 1 мільён 400 тысяч рублёў).
Цяпер чарга дайшла да пастара Вячаслава Ганчарэнкі. Суд палічыў, што подпісы зьбіраліся з парушэньнямі дзейнага заканадаўства. Судзьдзя Ўладзімер Аўдзеенка пытаўся, ці былі зарэгістраваныя ініцыятыўныя групы. Спасылкі абвінавачанага на тое, што гэта ня выбары і патрабаваньні выбарчага заканадаўства тут не павінны дзейнічаць, на судзьдзю не паўплывалі. Пастара пакаралі штрафам на адзін мільён 400 тысяч рублёў.
Пастар Вячаслаў Ганчарэнка так пракамэнтаваў гэты прысуд:
“Гэта вялікая сума. Усё гэта — комплекс ціску на нашу царкву з-за таго, што мы ігнаруем іх рашэньні і лічым іх незаконнымі. Мы свой будынак усё роўна нікому не аддамо. Будзем змагацца да перамогі”.
Адразу пасьля абвяшчэньня пастановы судзьдзя пачаў разглядаць яшчэ адзін адміністрацыйны пратакол. Гэтым разам – за невыкананьне пракурорскага распараджэньня. Яго накіравалі вернікам царквы пасьля таго, як тыя забаранілі ўваход у свой будынак прадстаўнікам энэрганагляду, пажарным ды прадстаўнікам камунальных службаў.
Нагадаем: у 2006 годзе вернікі трымалі галадоўку ў будынку царквы, патрабуючы, каб гарадзкія ўлады вярнулі вернікам зямельны надзел, не адбіралі ў іх храм і далі магчымасьць ладзіць набажэнствы.
Гаворыць Вячаслаў Ганчарэнка:
“Мы верым, што будынак застанецца за намі. Мы туды ўклалі вялікія грошы і ўкладаем. Будынак належыць нам”.
За невыкананьне пракурорскага распараджэньня пастара аштрафавалі яшчэ на 350 000 рублёў.
Вернік пратэстанцкай суполкі “Новае жыцьцё” Віталь Антончыкаў прыйшоў у суд разам зь некалькімі іншымі вернікамі на знак салідарнасьці са сваім пастарам.
“Мы занепакоеныя тым, што адбываецца вакол царквы “Новае жыцьцё” і асабіста пастара Вячаслава. Гэты ціск ня мае ніякага сэнсу. Пачынаючы ад 2004 году то ў нас пракуратура, то мы павінны бараніць свой будынак — не пускаем то адны, то іншыя службы... Папросту арганізаваны ціск на нашу царкву з боку ўладаў”.
Позву ў суд накіравалі і юрысту царквы “Новае жыцьцё” Сяргею Луканіну. Яго справу будуць разглядаць на наступным тыдні.
