Адна з найбуйнейшых у сьвеце аўдытарска-кансалтынгавых кампаніяў Ernst & Young (EY) прадставіла сёньня грунтоўны агляд (спампаваць у PDF) цяперашняга стану і пэрспэктываў індустрыі інфармацыйных тэхналёгіяў у Беларусі.
Свабода выбрала 10 самых цікавых фактаў пра сэктар эканомікі, які разьвіваецца найбольш імклівымі тэмпамі.
1. 115 тысяч айцішнікаў
Паводле разьлікаў EY, у Беларусі сёньня звыш 115 тысяч спэцыялістаў сфэры інфармацыйна-камунікацыйных тэхналёгіяў (ІKТ). 85 тысяч зь іх занятыя непасрэдна ў ІKТ-галіне, рэшта — у іншых сэктарах эканомікі.
2. ПВТ — аснова ІТ-індустрыі
Сёньня 181 беларуская кампанія з сукупным штатам у 30 тысяч чалавек — рэзыдэнты Парку высокіх тэхналёгіяў, створанага ў 2005 годзе прэзыдэнцкім дэкрэтам. Кампаніі-рэзыдэнты ПВТ вызваленыя ад cплаты ўсіх карпаратыўных падаткаў, а індывідуальны падаходны падатак для іх супрацоўнікаў мае паніжаную 9-адсоткавую стаўку і не ўключаецца ў сукупны гадавы прыбытак.
На долю рэзыдэнтаў ПВТ прыпадае 28,9% прыбытку ІКТ-сэктару і 85,7% экспарту кампутарных паслугаў.
3. Большасьць кампаніяў — да 100 чалавек
Памер больш як 70% кампаніяў-рэзыдэнтаў ПВТ не перавышае 100 супрацоўнікаў. Пры гэтым больш за палову айцішнікаў ПВТ працуюць у буйных кампаніях, штаты якіх перавышаюць 500 чалавек.
4. Самая высокааплатная сфэра
Па выніках 2016 году сярэдні заробак у сфэры ІКТ склаў 1800 даляраў — у 4,5 раза вышэй, чым агулам па краіне. Паводле прагнозу EY, сярэдні заробак у ПВТ у 2020 годзе дасягне 2,4 тысячы даляраў.
5. Самая маладая галіна
57% супрацоўнікаў кампаніяў-рэзыдэнтаў ПВТ маладзейшыя за 30 гадоў. Пры гэтым 49% беларускіх айцішнікаў пачалі працоўную кар’еру да 21 году. Каля 12% айцішнікаў — студэнты.
6. Экспарт ІТ-паслугаў вырас у 30 разоў
Як расьце экспарт ІТ-паслуг з Беларусі. Крыніца: The IT Industry in Belarus: 2017 and Beyond by EY
За апошнія 11 гадоў экспарт ІТ-паслугаў і прадуктаў зь Беларусі вырас у 30 разоў, дасягнуўшы 956,8 млн даляраў (2016). Пры гэтым доля ІТ-экспарту ў агульным абʼёме экспарту тавараў і паслугаў краіны вырасла з 0,16% да 3,25%. На долю ІКТ прыпадае 10,5% ВУП у сэктары паслугаў і 5,1% агульнага ВУП Беларусі.
7. Самая экспартаарыентаваная галіна
Больш за 90% продажаў беларускіх ІТ-кампаніяў — за мяжу. 49,1% экспарту прыпадае на Заходнюю Эўропу, 43,1% — на ЗША.
69% апытаных аналітыкамі кампаніяў зарабляюць, выконваючы замовы кліентаў (аўтсорсінг). Меншасьць распрацоўвае ўласныя высокатэхналягічныя прадукты — гэта значна складаней, але і выгадней фінансава. World of Tanks, MSQRD, Maps.me — вядомыя ва ўсім сьвеце праграмы, прыдуманыя і распрацаваныя ў Беларусі.
Boeing 737-300 „Белавія“ з рэклямаю кампутарнай гульні
8. Інвэстыцыі імкліва растуць
З 2011 па 2014 гады, паведамляе EY, інвэстыцыі ў ІКТ-сэктар вырасьлі амаль утрая — да 1,47 мільярда даляраў. Тры галоўныя краіны-інвэстары — ЗША, Нідэрлянды і Расея.
9. Адукацыя — гарантыя посьпеху
Тэхнічныя дысцыпліны ў Беларусі вывучаюць у ВНУ 75 тысяч чалавек (24% ад агульнай колькасьці студэнтаў). Сярод гэтых дысцыплін — 70 ІТ-спэцыяльнасьцяў. Больш за траціну супрацоўнікаў кампаніяў-рэзыдэнтаў ПВТ — выпускнікі БДУІР, «галоўнай айцішнай ВНУ».
ІТ-кампаніі стварылі 52 сумесныя лябараторыі ў 15 адукацыйных установах Беларусі, аднак у большасьці беларускіх выкладчыкаў заробкі непрапарцыйна нізкія ў параўнаньні з супрацоўнікамі ІТ-кампаніяў.
10. Ангельская мова — норма
Сёньня большасьць кваліфікаваных беларускіх ІТ-спэцыялістаў валодаюць ангельскай мовай (асноўны сродак камунікацыі з замежнымі калегамі і кліентамі). Усяго 5 гадоў таму такіх было зусім мала.