Міністэрства сельскай гаспадаркі Расеі атрымала ад сваіх калег з Беларусі прагнозны балянс аб пастаўках малака і малочнай прадукцыі на 2015 год. У гэтым дакумэнце выстаўленыя кошты беларускай прадукцыі. Яны разьлічаныя паводле курсу 43 расейскія рублі за 1 даляр, піша расейская газэта «Известия».
Газэта са спасылкай на расейскіх трэйдэраў піша, што беларусы ўжо пачалі выстаўляць рахункі ў далярах, але аплата іх па-ранейшаму праводзіцца расейскімі рублямі.
У наступным годзе Беларусь прапануе паставіць на рынкі Расеі 956 тысяч тон малака і малочнай прадукцыі. Сёлета аб’ём паставак складае 772 тысячы тон.
«Известия» таксама пішуць, што крыніца ў расейскім міністэрстве паведаміла рэдакцыі: беларускую прапанову пра павелічэньне паставак у 2015 годзе вырашылі адхіліць.
18 сьнежня Аляксандар Лукашэнка запатрабаваў перайсьці ў разьліках з Расеяй на даляры. Ён сказаў, што гэта трэба было зрабіць ужо даўно, і разьлічвацца неабходна паводле той жа самай схемы, па якой Беларусь разьлічваецца са сваёй суседкай за энэрганосьбіты.