Амаль празь месяц пасьля выбараў 26 кастрычніка, на якіх перамагла кіроўная партыя «Грузінская мара», палітычная нестабільнасьць працягваецца ў Грузіі, піша AFP.
Праэўрапэйскія апазыцыйныя партыі адмовіліся ўваходзіць у новы парлямэнт, бо лічаць яго «нелегітымным».
Праэўрапейская прэзыдэнтка Саламэ Зурабішвілі, якая знаходзіцца ў канфрантацыі з кіроўнай партыяй, падала пазоў у Канстытуцыйны суд з патрабаваньнем ануляваць вынікі.
Пратэст ля будынку парлямэнту Грузіі. Тбілісі, 25 лістапада 2024
Прэзыдэнтка абвінаваціла Расею ва ўмяшаньні ў выбары, што Масква адмаўляе. Яна адмовілася падпісваць прэзыдэнцкі ўказ аб скліканьні новага парлямэнту.
Партыя «Грузінская мара», якая атрымала 89 месцаў у парлямэнце з 150, заяўляе, што выбары былі свабоднымі і сумленнымі. Сьпікер парлямэнту Шалва Папуашвілі паведаміў, што дэпутаты зьбяруцца, нягледзячы на адсутнасьць указу прэзыдэнта.
Першае паседжаньне парлямэнту Грузіі 11-га скліканьня пачалося 25 лістапада ў 12:00.
Пленарную сэсію новаабранага парлямэнту пачаў яго найстарэйшы дэпутат Ладо Кахадзэ. Рэгістрацыю прайшлі 88 дэпутатаў.
Апазыцыя ў сваю чаргу выйшла на мітынгу ля будынку парлямэнту раніцай у панядзелак, піша «Эхо Кавказа».
Удзельнікі пратэсту ў Тбілісі
Апазыцыя сьцьвярджае, што ўрад «Грузінскай мары» ссоўвае замежнапалітычны курс краіны ў кірунку Расеі і падрывае яе даўнія памкненьні да ўступленьня ў Эўразьвяз, што кіроўная партыя адмаўляе.
З моманту выбараў дзясяткі тысяч людзей выходзілі на вуліцы Тбілісі з пратэстамі супраць меркаваных фальсыфікацый.
Эўрапейскі зьвяз і Злучаныя Штаты заклікалі да расьсьледаваньня парушэнняў, выяўленых падчас галасаваньня.
Папуашвілі паведаміў, што дэпутаты новага парляамэнту павінны прагаласаваць за перапрызначэньне цяперашняга прэм’ер-міністра Іраклія Кабахідзэ на пасаду кіраўніка ўраду.
Права на вылучэньне прэм’ер-міністра належыць заснавальніку і ганароваму старшыні партыі «Грузінская мара» Бідзіну Іванішвілі, якога лічаць неафіцыйным кіраўніком краіны без афіцыйнай пасады ва ўрадзе.
Намёты каля будынку парлямэнту Грузіі. Тбілісі, 25 лістапада 2024
Дэпутаты таксама хочуць назваць дату прэзыдэнцкіх выбараў, якія чакаюцца да канца году.
Упершыню ў гісторыі краіны наступны прэзыдэнт будзе выбраны калегіяй электараў, якая складаецца з дэпутатаў і мясцовых чыноўнікаў, а не ўсеагульным галасаваньнем.
Чакаецца, што Зурабішвілі пакіне пасаду ў выніку канстытуцыйнай рэформы, прынятай у 2017 годзе.
Удзельнік пратэстаў у Тбілісі
Пасьля парлямэнцкіх выбараў група вядучых грузінскіх назіральнікаў заявіла, што выявіла доказы складанай схемы маштабных фальсыфікацый, якія паўплывалі на вынікі на карысьць «Грузінскай мары».
Ганаровы старшыня партыі «Грузінская мара» Бідзіна Іванішвілі (зьлева ў першым шэрагу)
Галоўны дыпламат ЭЗ Жузэп Бурэль заявіў напярэдадні выбараў, што правядзеньне галасаваньня стане вырашальным для пэрспэктыў краіны ўступіць у зьвяз.
«Грузінская мара» адмаўляе абвінавачаньні ў фальсыфікацыях і заяўляе, што сяброўства ў ЭЗ застаецца «галоўным прыярытэтам» ураду.
ГЛЯДЗІЦЕ ТАКСАМА: У Тбілісі арганізатары распусьцілі акцыю пратэсту ГЛЯДЗІЦЕ ТАКСАМА: Паліцыя разагнала намётавае мястэчка каля ўнівэрсытэту ў Тбілісі. ФОТА