Дзяніс Кучынскі, дарадца Ціханоўскай у дыпляматычных пытаньнях, камэнтуючы перамогу Дональда Трампа на выбарах у ЗША, адзначыў, што падтрымка дэмакратычнай Беларусі ёсьць і з боку рэспубліканцаў, і з боку дэмакратаў, і выказаў спадзяваньне на працяг супрацоўніцтва беларускіх дэмакратычных сілаў з адміністрацыяй Трампа.
«Мы спадзяёмся, што падтрымка дэмакратычнай Беларусі з боку ЗША працягнецца. Мы бачым на мінулых прыкладах нашай гісторыі супрацоўніцтва і калябарацыі, што падтрымка Беларусі двухпартыйная — і ад рэспубліканцаў, і ад дэмакратаў.
З гісторыі нашага супрацоўніцтва з рэспубліканцамі можна ўзгадаць, напрыклад, „Акт аб дэмакратыі ў Беларусі“ — яго распрацоўваў і цяпер распрацоўвае рэспубліканец Крыс Сьміт. У Кангрэсе ЗША створаныя кокусы, у якія таксама ўваходзяць рэспубліканцы — напрыклад, сэнатар Саліван, сэнатар Грэхам таксама нас падтрымлівае», — адзначыў Кучынскі.
Дарадца Ціханоўскай у дыпляматычных пытаньнях адзначыў, што падчас візытаў у Вашынгтон гэтым летам беларускія дэмакратычныя сілы «наладзілі працоўныя кантакты з атачэньнем Трампа».
«У прыватнасьці, я меў сустрэчу з дарадцам у нацыянальнай бясьпецы цяперашняга віцэ-прэзыдэнта Дж.Д. Вэнса. Здаецца, ёсьць агульнае разуменьне нашай сытуацыі ў Беларусі. Мы працягнем працаваць з гэтымі кантактамі ў Рэспубліканскай партыі, а таксама ў адміністрацыі Трампа», — сказаў Кучынскі.
Таксама ён нагадаў пра «беспрэцэдэнтны» Стратэгічны дыялёг паміж Злучанымі Штатамі і беларускімі дэмакратычнымі сіламі, і выказаў спадзяваньне на працяг гэтай супрацы — і ў межах Стратэгічнага дыялёгу, і зь Дзярждэпартамэнтам ЗША, і зь Белым домам.
«Спадзяёмся, што беларускае пытаньне ня сыдзе з парадку дня. Але галоўнае зноў жа — як зрабіць Беларусь больш рэлевантнай, як зрабіць беларускае пытаньне больш актуальным для амэрыканскіх палітыкаў, для Белага дома, для Дзярждэпартамэнту. Будзем спадзявацца, што палітыка ЗША ў дачыненьні да Беларусі будзе заставацца прынцыповай і нейкіх вялікіх зьменаў, асабліва ў нэгатыўны бок, мы не адчуем», — сказаў Кучынскі.
Адказваючы на пытаньне аб працягу працы па вызваленьні беларускіх палітзьняволеных, Кучынскі адзначыў, што пры адміністрацыі Трампа адбыліся першыя сустрэчы Сьвятланы Ціханоўскай з чыноўнікамі зь Дзярждэпартамэнту, у прыватнасьці — з тагачасным намесьнікам дзяржсакратара ЗША Стывэнам Біганам, бо падчас пратэстаў 2020 году ў Беларусі «якраз была адміністрацыя Трампа».
«Наконт палітвязьняў: безумоўна, пры любой адміністрацыі — і дэмакратаў, і рэспубліканцаў — пытаньне палітвязьняў павінна быць на парадку дня і мы павінны шукаць шляхі да іх вызваленьня», — падкрэсьліў Кучынскі.
ГЛЯДЗІЦЕ ТАКСАМА: Дональд Трамп вяртаецца на пасаду прэзыдэнта ЗША ГЛЯДЗІЦЕ ТАКСАМА: Што казаў Дональд Трамп пра БеларусьПрэзыдэнцкія выбары ў ЗША 2024 году
- За перамогу змагаліся два палітыкі: былы прэзыдэнт, 78-гадовы Дональд Трамп, кандыдат ад Рэспубліканскай партыі, і віцэ-прэзыдэнтка, 60-гадовая Камала Гарыс, кандыдатка ад Дэмакратычнай партыі. Па выніках выбараў Дональд Трамп забясьпечыў сабе вяртаньне ў Белы дом.
- Дональд Трамп балятаваўся на пасаду трэці раз. У 2020 годзе ён прайграў Джо Байдэну.
- Трамп стаў другім прэзыдэнтам у гісторыі, які выйграў выбары пасьля перапынку ў кадэнцыях. Адзіным прэзыдэнтам, які дасягнуў гэтага, быў Гровэр Кліўлэнд, яшчэ ў канцы XIX стагодзьдзя.
- Камала Гарыс замяніла Джо Байдэна на выбарах ад Дэмакратычнай партыі. Гэта адбылося пасьля ягонага кепскага выступу на дэбатах з Дональдам Трампам, які падкрэсьліў, што ёсьць прычыны для занепакоенасьці ягоным узростам.
- Гарыс падкрэсьлена падтрымлівала права на аборты пасьля рашэньня Вярхоўнага суду ў 2022 годзе, якое спыніла канстытуцыйнае права на аборты. Гарыс назвала Трампа «пагрозай для дэмакратыі», адзначыўшы ягоную ролю ў нападзе 6 студзеня на Капітолій ЗША і яго адмову прызнаць пройгрыш Байдэну ў 2020 годзе.
- Трамп жа заявіў, што на другім магчымым тэрміне ён зробіць больш для паляпшэньня эканомікі, спыніць хвалю мігрантаў і будзе больш жорсткім у адносінах да супернікаў ЗША, такіх як Кітай.
- Гарыс заявіла, што будзе працягваць палітыку Байдэна ў дапамозе Ўкраіне. Трамп паставіў пад сумнеў падтрымку Ўкраіны, заявіўшы, што Эўропа павінна несьці асноўную частку цяжару падтрымкі Кіева ў змаганьні супраць расейскага ўварваньня.
- Свабода аналізавала, чаму вынік выбараў у ЗША залежыць ад «хісткіх штатаў». Усяго такіх штатаў сем: Пэнсыльванія, Мічыган, Вісконсін, Арызона, Нэвада, Джорджыя і Паўночная Караліна. У 38 штатах адна і тая ж партыя атрымлівае большасьць галасоў на кожных прэзыдэнцкіх выбарах з пачатку XXI стагодзьдзя, часта зь вялікай перавагай. Толькі 12 штатаў «зьмянялі перавагі» хаця б раз з 2000 году.
- У некаторых штатах адна партыя дамінуе яшчэ даўжэй, напрыклад у Мінэсоце з 1976 году большасьць галасоў стабільна атрымлівае кандыдат ад дэмакратаў, а ў Тэхасе з 1980 году перамагае рэспубліканец.
- Таксама ў лістападаўскай кампаніі 2024 году перавыбіраецца траціна Сэнату і ўвесь склад Палаты прадстаўнікоў.
- Сэнат зацьвярджае на пасадах прызначэнцаў прэзыдэнта, у тым ліку судзьдзяў усіх узроўняў, і ратыфікуе міжнародныя пагадненьні. Кожны штат прадстаўляюць два сэнатары — усяго іх сто, тэрмін паўнамоцтваў — шэсьць гадоў. Барацьба ідзе за 34 месцы са 100 наяўных.
- Палата прадстаўнікоў традыцыйна адыгрывае ключавую ролю ў працы над бюджэтам ЗША і сфэрай падаткаў, а таксама мае права ініцыяваць працэдуру імпічмэнту фэдэральным службовым асобам, уключаючы прэзыдэнта. Цяпер у Палаце засядаюць 435 кангрэсмэнаў, тэрмін кадэнцыі якіх складае два гады. Яны прадстаўляюць 50 штатаў, а таксама Фэдэральную акругу Калюмбія (мае дарадчы голас) і пяць тэрыторый ЗША.