У Грузіі на парлямэнцкіх выбарах пасьля падліку зьвестак з 3085 участкаў (99,164% ад агульнай колькасьці) перамагае кіроўная прарасейская партыя «Грузінская мара». Яна набрала 54,273%, паведамляе «Эхо Кавказа».
Паводле абноўленых, папярэдніх вынікаў ЦВК Грузіі, пасьля падліку бюлетэняў выбарнікаў на 3085 участках (99,164% ад агульнай колькасьці) на парлямэнцкіх выбарах «Грузінская мара — Дэмакратычная Грузія» атрымала 54,273% (1 114 936 галасоў).
Паводле папярэдніх вынікаў, толькі чатыры апазыцыйныя партыі пераадолелі бар’ер у 5% галасоў, каб атрымаць месцы ў парлямэнце:
- «Кааліцыя за перамены» — 10,806%,
- «Адзінства — Нацыянальны рух» — 10,094%,
- «Моцная Грузія» — 8,752%,
- «Гахарыя за Грузію» — 7,75%.
Агулам падчас выбараў у Грузіі было адчынена 3111 выбарчых участкаў.
Паводле папярэдніх зьвестак ЦВК на 52 выбарчых участках, адкрытых за мяжой, 29,076% галасоў (5489 галасоў) выбарнікі аддалі «Кааліцыі за перамены». За ёй ідуць «Адзінства — Нацыянальны рух» — 20,839%, «Грузінская мара» — 17,735%, «Моцная Грузія» — 14,053%, «Гахарыя за Грузію» — 8,449% галасоў.
За мяжой участкі былі адчыненыя ў 53 гарадах 42 краінаў сьвету.
Паводле зьвестак ЦВК, яўка выбарнікаў склала 58,9%, агулам прагаласавалі 2 060 412 грамадзян Грузіі.
Апазыцыйныя партыі, якія пераадолі парог у 5% галасоў, адмовіліся прызнаваць вынікі выбараў.
«Выбары скрадзеныя. Гэта канстытуцыйны пераварот, „Мара“ зьяўляецца аўтарам канстытуцыйнага перавароту і будзе прыцягнутая да адказнасьці ў парадку, прадугледжаным заканадаўствам Грузіі», — пракамэнтаваў першыя зьвесткі грузінскага ЦВК адзін зь лідэраў «Кааліцыі за перамены» Ніка Гварамія.
У «крадзяжы выбараў» кіроўную партыю абвінаваціла і кіраўнік «Адзінага нацыянальнага руху» Цінацін Бакучава. «ЦВК Грузіі выканаў брудную замову Іванішвілі. „Адзінства — Нацыянальны рух“ пераходзіць у рэжым надзвычайнай сытуацыі», — заявіла Бакучава на экстраным брыфінгу.
Партыя «Моцная Грузія» таксама не прызнала папярэднія вынікі галасаваньня. «Мы абураныя тым, што адважылася напісаць ЦВК. Вынікі не адлюстроўваюць волю грузінскага народа», — заявілі ў партыі.
У партыі Гахарыя «За Грузію» заявілі, што парушэньні ў дзень выбараў паўплывалі на афіцыйныя зьвесткі, але пакуль не аб’яўлялі аб непрызнаньні вынікаў.
Пра непрызнаньне вынікаў выбараў заявілі і аўтарытэтныя няўрадавыя арганізацыі, якія назіралі за выбарамі.
Першае паседжаньне парлямэнта Грузіі пройдзе ў звычайным рэжыме і ўрад будзе зацьверджаны, нягледзячы на адмову апазыцыі прызнаваць вынікі галасаваньня, заявіў прэм'ер-міністар краіны Іраклій Кабахідзэ. Камэнтуючы заявы апанэнтаў аб «скрадзеных выбарах», Кабахідзэ заявіў, што ў іх проста «не хапіла годнасьці зьмірыцца з чарговай паразай».
Атрымаўшы большасьць месцаў у новым парлямэнце, «Грузінская мара» цяпер зможа выбраць новага прэзыдэнта. Выбары пройдуць цягам 45 дзён пасьля першага пасяджэньня новаабранага парлямэнту.
Кіраўніка дзяржавы ўпершыню будуць выбіраць не грамадзяне, а члены выбарчай калегіі — дэпутаты парлямэнту, вышэйшых прадстаўнічых органаў Абхазскай і Аджарскай аўтаномных рэспублік, а таксама члены прадстаўнічых органаў мясцовага самакіраваньня. Пры гэтым адхіліць ад пасады дзейную прэзыдэнтку Саламэ Зурабішвілі праз працэдуру імпічмэнту «Грузінская мара» ня зможа, бо для гэтага патрэбна 100 галасоў у парлямэнце.
Пасьля закрыцьця выбарчых участкаў на парлямэнцкіх выбарах у Грузіі праўрадавая тэлекампанія «Імэдзі» і апазыцыйныя каналы «Формула» і «Мтавары» абвясьцілі вынікі экзытполаў. «Грузінская мара» прайграе выбары —паводле «Формулы» і «Мтавары», праўладнае апытаньне «Імэдзі» паказала яе перамогу.
Парлямэнцкія выбары ў Грузіі суправаджаліся фальсыфікацыямі, сутычкамі і нападамі на журналістаў. «Грузінская мара» пачала сьвяткаваць сваю перамогу загадзя, да будынка адміністрацыі ўраду былі сьцягнутыя сілавікі.
Грамадзяне Грузіі абіралі 150 дэпутатаў у парлямэнт паводле прапарцыянальнай сыстэмы — працэнт галасоў, атрыманы той ці іншай партыяй, адпавядае колькасьці месцаў у парлямэнце. Партыі або кааліцыі мусілі набраць ня менш за 5 працэнтаў, каб трапіць у парлямэнт. Гэта падштурхнула шматлікія апазыцыйныя партыі да супрацоўніцтва, каб мець шанцы на пераадоленьне парогу.
ГЛЯДЗІЦЕ ТАКСАМА: У Грузіі — парлямэнцкія выбары. Чаму яны важныя і што пра іх трэба ведаць? ГЛЯДЗІЦЕ ТАКСАМА: У Грузіі тры тэлеканалы апублікавалі экзытполы. Яны розныя