4 верасьня на свабоду праз памілаваньне выйшла палітзьняволеная актывістка руху «Маці-328» Марына Кісялевіч. Пра гэта паведаміла на сваёй старонцы ў «Фэйсбуку» кіраўніца ініцыятывы «Палітвязынка» Яўгенія Доўгая.
Марыну Кісялевіч затрымалі 7 лютага 2022 году паводле «даносу неабыякавага» па допісах «УКантакце» па двух дыфамацыйных артыкулах Крымінальнага кодэксу: ч. 2 арт. 368 (абраза Лукашэнкі) і ч. 2 арт. 367 (паклёп на Лукашэнку).
Марыну доўгі час утрымлівалі ў РНПЦ псыхічнага здароўя ў Навінках, потым яе перавялі ў СІЗА № 1. Вядома, што ў зьняволеньні жанчыну зьмяшчалі ў карцар за нязгоду з пастаноўкай на ўлік як «схільную да экстрэмісцкай і іншай дэструктыўнай дзейнасьці», а яна абвяшчала галадоўку.
У траўні 2022 году Марыну Кісялевіч асудзілі на 4 гады абмежаваньня волі з накіраваньнем у папраўчую ўстанову адкрытага тыпу. Тэрмін жанчына адбывала ў берасьцейскай ПУАТ-1.
Паводле зьвестак праваабаронцаў, 12 красавіка 2024 году прайшло судовае пасяджэньне па ўзмацненьні пакараньня Марыне Кісялевіч: у выніку ёй замянілі абмежаваньне волі на пазбаўленьне волі ў калёніі тэрмінам на 10 месяцаў.
Сын Марыны Кісялевіч быў асуджаны ў 2017 годзе на 13 гадоў калёніі.
ГЛЯДЗІЦЕ ТАКСАМА: Лукашэнка памілаваў яшчэ 30 палітвязьняў. Сталі вядомыя прозьвішчы 2 зь іх- 4 верасьня стала вядома, што Аляксандар Лукашэнка памілаваў 30 чалавек, асуджаных за «злачынствы пратэставай накіраванасьці». Сярод памілаваных 7 жанчын і 23 мужчыны. Большасьць асуджаных — бацькі непаўналетніх і малалетніх дзяцей. Большасьць зь іх былі асуджаныя паводле артыкулаў аб «абразе» і «паклёпе», удакладніў генпракурор Беларусі Андрэй Швед.
- 3 ліпеня выйшлі на волю 18 палітзьняволеных. Сярод іх — 4 жанчыны і 14 мужчын, у тым ліку асуджаны на 10 гадоў калёніі і хворы на анкалёгію Рыгор Кастусёў.
- 16 жніўня Лукашэнка падпісаў указ аб памілаваньні 30 палітзьняволеных, сярод якіх 14 жанчын і 16 мужчын, некаторыя зь іх маюць сур’ёзныя захворваньні. Таксама ёсьць пэнсіянэры. Прозьвішчаў памілаваных тады афіцыйна таксама не называлі, сам указ не публікаваўся. Пасьля праваабаронцам сталі вядомыя прозьвішчы некаторых вызваленых вязьняў, сярод іх — Ксенія Луцкіна, Вольга Новікава, Ала Зуева, Вольга Стаброўская, Васіль Берасьнеў, Ірына Санкоўская, Кацярына Леў, Натальля Пятровіч, Тамара Каравай, Сьвятлана Палуэктава, Яўген Чуміла.