У праекце «Сьведкі Лукашэнкі» пісьменьніца Сьвятлана Курс разважае пра тое, чаму, паводле сацыялёгіі, беларускія жанчыны на многіх выбарах падтрымлівалі Лукашэнку значна больш актыўна за мужчынаў.
— Лукашэнка шмат у чым падобны на такога беларускага мужыка, на ягоныя добрыя і кепскія бакі. Штосьці ў ім такое ёсьць, што нам усім зразумела. Мы можам з гэтага пасьмяяцца, але нейкі мемны вобраз, нейкі народны вобраз у ім ёсьць.
І потым, ён вельмі моцна прыслужыўся кабетам. Тыя старыя пакаленьні зьведалі пасьля вайны даволі вялікі дэфіцыт мужчынаў.
Да таго ж, пасьля вайны многія беларускі не зазналі «моцнага мужчыну», які б валок на сабе гаспадарку, ня піў і быў добрым абаронцам. Гэтыя жанчыны цягнулі на сабе ўсё і вельмі хацелі моцнай рукі і пляча. І ім падалося, што гэты «пакаці-гарошак» будзе ім такім абаронцам.
Цалкам інтэрвію з Сьвятланай Курс у праекце «Сьведкі Лукашэнкі» глядзіце тут:
«Сьведкі Лукашэнкі»
«Сьведкі Лукашэнкі» – сэрыя відэаінтэрвію зь людзьмі, якія паспрабуюць ацаніць тое, што і чаму адбылося ў Беларусі ў 1994 годзе і як зьмянілася беларускае грамадзтва за гэтыя 30 гадоў.
Сёлета спаўняецца 30 гадоў з моманту першых прэзыдэнцкіх выбараў у Беларусі. Чаму тагачаснае беларускае грамадзтва выбрала Аляксандра Лукашэнку, ці магло ўсё скласьціся па-іншаму або менавіта такі вынік быў тады наканаваным? Які шлях прайшло беларускае грамадзтва за гэтыя 30 гадоў, ці вывучыла яно ўрокі гісторыі?
Гэтыя ды іншыя тэмы Віталь Цыганкоў абмяркоўвае з гасьцямі Свабоды ў праекце «Сьведкі Лукашэнкі».