Заснавальніка Telegram Паўла Дурава ўзялі пад судовы нагляд у Францыі

Павал Дураў павінен унесьці заклад у памеры 5 мільёнаў эўра, паведамілі ў пракуратуры. З паведамленьня дакладна не зразумела, ці Дураў ужо ўнёс заклад і дзе ён цяпер знаходзіцца.

З заявы пракуратуры вынікае, што Паўла Дурава абвінавачваюць у зьдзяйсьненьні наступных злачынстваў:

• змове з мэтай адміністраваньня онлайн-плятформы для зьдзяйсьненьня незаконных угодаў у складзе арганізаванай групы;
• адмове ў даваньні інфармацыі або дакумэнтаў на запыт упаўнаважаных органаў;
• саўдзеле ў правапарушэньнях, якія датычацца распаўсюджваньня парнаграфіі зь непаўналетнімі, незаконнага абарачэньня наркотыкаў і махлярства;
• адмываньні сродкаў;
• аказаньні крыптапаслуг без дэкларяваньня;
• імпарце крыптаінструмэнтаў без дэкляраваньня.

У дакумэнце зазначаецца, што папярэдняе расьсьледаваньне ў дачыненьні да Паўла Дурава ў Францыі пачалі яшчэ ў лютым.

Пракуратура таксама паведаміла яшчэ пра два расьсьледаваньні, якія вядуць у дачыненьні да Дурава. Займаюцца імі кібэрпадразьдзяленьне францускай жандармэрыі і ўпраўленьне барацьбы з махлярствам францускай мытні.

Афіцыйнае расьсьледаваньне ў Францыі, адзначае Reuters, не азначае, што чалавек вінаваты, і не абавязкова вядзе да судовага разбору, але ўказвае на тое, што судзьдзі лічаць, што ў справе ёсьць дастаткова падставаў для працягу расьсьледаваньня. Расьсьледаваньне можа доўжыцца гадамі, перш чым яго перададуць у суд або спыняць.

Дурава затрымалі ўвечары 24 жніўня ў парыскім аэрапорце Ле-Буржэ, куды ён прыляцеў з Азэрбайджана на прыватным самалёце. Ён быў зь целаахоўнікам і жанчынай, якіх пасьля допыту адпусьцілі.

Ордэр на арышт Паўла Дурава і ягонага брата Мікалая, паводле зьвестак Politico, францускія ўлады выдалі яшчэ 25 сакавіка. З дакумэнта, які апынуўся ў распараджэньні рэдакцыі, вынікае, што расьсьледаваньне ў дачыненьні да Telegram зьяўляецца больш маштабным і пачалося на некалькі месяцаў раней, чым пра гэта стала вядома.