Пра гэта піша амэрыканскае выданьне Forbes.
Паводле зьвестак выданьня, першапачаткова суд адмовіўся разглядаць справу, бо пазоў быў пададзены больш як праз тры месяцы пасьля апошняга выпадку меркаванага гвалту. Аднак у траўні 2023 году Балгар падала апэляцыю, і суд вырашыў працягнуць разгляд справы ў кастрычніку.
Паводле абвінавачаньняў, Дураў ужываў гвалт у дачыненьні да свайго малодшага сына, які нарадзіўся ў верасьні 2017 году, пяць разоў у пэрыяд з 2021 па 2022 год. У выніку ў дзіцяці, як сьцьвярджаецца, адбылося страсеньне мазгоў.
У якасьці доказаў віны Паўла Дурава Балгар падала стэнаграму іх перапіскі і мэдычную даведку ад красавіка 2023 году, у якой сказана, што яе сын пакутуе ад парушэньняў сну і трывожнасьці.
Таксама Балгар, як сьцьвярджаецца, падала пазоў аб апецы над дзецьмі. Суд прыняў рашэньне на яе карысьць. Дураў у разглядзе ня ўдзельнічаў. Балгар падала абодва пазовы празь некалькі месяцаў пасьля таго, як Дураў нібыта перастаў выплочваць ёй алімэнты ў памеры 150 тысяч эўра ў месяц.
Прадстаўнік Дурава адмовіўся ад камэнтароў.
Увечары 24 жніўня Дурава затрымалі ў парыскім аэрапорце Ле-Буржэ, куды ён прыляцеў з Азэрбайджану на прыватным самалёце. Разам зь ім былі целаахоўнік і спадарожніца, якіх пазьней адпусьцілі.
Празь некаторы час стала вядома, што Дурава затрымалі ў рамках расьсьледаваньня, якое праводзяць у дачыненьні да неўстаноўленых асобаў паводле 12 складоў злачынстваў.
ГЛЯДЗІЦЕ ТАКСАМА: Wall Street Journal: Макрон прапаноўваў Дураву перанесьці офіс Telegram у Парыж, але той адмовіўся ГЛЯДЗІЦЕ ТАКСАМА: У Францыі Дурава падазраюць у 12 злачынствах. Справу супраць яго завялі яшчэ 8 ліпеня