«ПіК Свабоды». Ці правядзе Лукашэнка датэрміновыя выбары 23 лютага

Глядзець размову на відэа цалкам

Тут фрагмэнт гутаркі

— Паводле зьвестак аб’яднаньня былых сілавікоў «Белпол», якое мае доступ да інсайдэрскай інфармацыі зь дзяржаўных органаў, беларускія ўлады прынялі рашэньне правесьці прэзыдэнцкія выбары 23 лютага 2025 году. Арганізацыя спасылаецца на «надзейныя крыніцы ўнутры Беларусі». Нібыта падрабязныя пляны выбарчай кампаніі ўжо распрацаваныя, але хаваюцца ад грамадзтва. Паводле Канстытуцыі Беларусі выбары прэзыдэнта прызначаюцца Палатай прадстаўнікоў не пазьней як за пяць месяцаў і праводзяцца не пазьней як за два месяцы да сканчэньня тэрміну паўнамоцтваў папярэдняга прэзыдэнта. Гэта значыць, што выбары павінны быць прызначаныя дзесьці ў ліпені 2025 году, не пазьней за 20 чысло. Калі інфармацыя «Белполу» цалкам спраўджваецца, то якія прычыны прымушаюць улады прызначаць выбары датэрмінова?

— У Лукашэнкі гэта не адзіны выпадак, калі выбары крыху пасоўваюца па тэрмінах. Магчыма, маецца на ўвазе занепакоенасьць тым, што сытуацыя можа зьмяніцца. Пад гэтым «можа зьмяніцца» можна разумець што заўгодна. Мая гіпотэза зьвязаная з тым, што невядома, чым скончыцца наступнае лета з пункту гледжаньня вайсковых дзеяньняў ва Ўкраіне. Плюс — здароўе Лукашэнкі, якое відавочна пагаршаецца, пра што ён ужо і сам вымушаны гаварыць. Я думаю, што, можа, гэта служыць прычынамі. Але ў нас, як заўсёды, дэфіцыт інфармацыі і няма інсайдэрскай інфармацыі. Тое, пра што цяпер гаворыць «Белпол», мы яшчэ дакладна ня ведаем, так гэта ці не.

І трэці момант. Нам невядома і незразумела ўсё, што адбываецца з даходнай часткай бюджэту, з эканамічнымі працэсамі. Мы ўвесь час чуем дастаткова пераможныя рэляцыі ад Галоўчанкі, але, магчыма, усё ня так добра і адназначна. Магчыма, што сацыяльная сытуацыя не такая адназначная. Паводле дасьледаваньняў эканамістаў, якія неўзабаве будуць агучаныя, сацыяльная абстаноўка пагаршаецца, падае індэкс разьвіцьця чалавечага патэнцыялу, увогуле сацыяльныя паказьнікі моцна зьмяніліся ў горшы бок. Плюс дэмаграфічныя праблемы. Гэта ўсё вельмі сыстэмныя фактары, яны не зьяўляюцца такімі трыгерамі, каб пераносіць выбары, але яны могуць сукупна разглядацца. А трыгерамі, магчыма, зьяўляюцца сытуацыя ў рэгіёне, сытуацыя на фронце і здароўе Лукашэнкі.