Па стане на 6 жніўня ў Беларусі 1388 палітвязьняў, прызнаных такімі праваабарончай супольнасьцю. Рэальная колькасьць зьняволеных паводле палітычных матываў можа быць большай.
Палітзьняволенага анархіста Ігара Аліневіча, асуджанага на 20 гадоў зьняволеньня, зь лякарні вярнулі ў турму ў Жодзіне, паведаміў 6 жніўня тэлеграм-канал анархістаў «Право на восстание».
Пра тое, што Аліневіч трапіў у шпіталь у Калядзічах, стала вядома 2 ліпеня. Якія праблемы са здароўем выявілі ў палітвязьня і чаму яго зьмясьцілі ў шпіталь, дасюль не вядома.
Напрыканцы траўня паведамлялі, што Аліневіча зьмясьцілі ў ШЫЗА. Раней яму неаднаразова прызначалі такое пакараньне. На знак пратэсту Аліневіч трымаў галадоўку.
- Ігар Аліневіч — актывіст анархічнага руху. Яго затрымалі ў кастрычніку 2020 году непадалёк ад беларуска-ўкраінскай мяжы.
- 22 сьнежня 2021 году Менскі абласны суд прызначыў анархістам Ігару Аліневічу і Сяргею Раманаву — па 20 гадоў калёніі, Дзьмітрыю Разановічу — 19 гадоў калёніі, Дзьмітрыю Дубоўскаму — 18 гадоў калёніі. Суд зь першага паседжаньня праходзіў у закрытым рэжыме.
- Іх абвінавацілі паводле артыкула 289 Крымінальнага кодэксу «Тэрарызм», а таксама паводле артыкула 295 «Незаконнае абарачэньне зброі». Палітвязьням паставілі ў віну падпал чатырох аўтамабіляў каля будынку пракуратуры ў Салігорску і мясцовага аддзяленьня Дзяржаўнага камітэту судовых экспэртызаў.
- Праз час пасьля прысуду Аліневіча этапавалі з мазырскай калёніі ў жодзінскую турму.