Былы баец палку Кастуся Каліноўскага Яўген Жураўскі ў размове з карэспандэнтам Польскага Радыё паведаміў пра выдадзеную ва Ўкраіне кнігу вядомага беларускага анархіста.
Паводле беларускага добраахвотніка Яўгена Жураўскага, ён арганізаваў пераклад і друк кнігі Ігара Аліневіча «Еду ў Магадан» на ўкраінскай мове і цяпер будзе шукаць спосабы яе распаўсюджваньня. Гэтая кніга магла б дапамагчы частцы ўкраінскага грамадзтва зразумець, што адбываецца ў Беларусі, мяркуе Яўген Жураўскі.
Тым часам у Варшаве па кнізе Ігара Аліневіча «Еду ў Магадан» 13 і 14 лістапада адбылася прэм’ера аднайменнага спэктакля тэатру «3 + КК» з чэскага гораду Брно. Спэктакль паставілі Адам Штайнбаўэр i Лiбар Брзабагаты. «Еду ў Магадан» гралі на чэскай мове на сцэне варшаўскага тэатру Druga Strefa з польскімі і беларускімі субтытрамі.
У 2013 годзе за кнігу «Еду ў Магадан», напісаную падчас ранейшага зьняволеньня (2010–2015 гг. — РС), Ігар Аліневіч першым сярод беларускіх палітвязьняў атрымаў прэмію імя Францішка Аляхновіча.
У 2021 годзе Ігара Аліневіча асудзілі на 20 гадоў зьняволеньня ва ўмовах узмоцненага рэжыму паводле абвінавачаньня ў тэрарызьме ды яшчэ двух злачынствах. Са жніўня мінулага году Ігара Аліневіча ўтрымліваюць у турме № 8 у Жодзіне, куды яго зьмясьцілі як парушальніка рэжыму на 3 гады. У 2022 годзе Ігар Аліневіч трымаў у турме галадоўку пратэсту. Сёлета ціск на вязьня працягваецца.
«За год яго зьмяшчалі ў ШЫЗА ня менш як 5 разоў. Апошні раз выйшаў з ШЫЗА на пачатку лістапада, пасьпеў даслаць паштоўку. Там ёсьць такія словы: „Вашы адносіны і любоў для мяне важнейшыя за ўсё“. А іншай сувязі зь ім няма, тэлефонных званкоў яму не дазваляюць», — паведаміла крыніца, абазнаная ў справах Ігара Аліневіча.
Паводле гэтай крыніцы, Ігар Аліневіч ніколі ня скардзіцца ні на ўмовы ўтрыманьня, ні на здароўе. Сваякі дасылаюць яму мэдычныя бандэролі, у якія ўкладаюць вітаміны і лекі ад запаленьня страўніка, але ня ўсе бандэролі даходзяць да адрасата.
Беларускія праваабаронцы прызналі Ігара Аліневіча палітычным вязьнем.
