У Кіеўскай гарадзкой вайсковай адміністрацыі заявілі, што ў ноч на 31 ліпеня Расея правяла найбольшую за апошні час атаку дронамі на ўкраінскую сталіцу.
Усе дроны зьбілі ў ваколіцах Кіева
Паводле кіеўскіх уладаў, спрацавалі сілы супрацьпаветранай абароны — у часе атакі зьбілі больш за 40 дронаў.
«Гэта была ўжо сёмая атака Кіева варожымі дронамі ў ліпені. Яна стала найбольшай за 2024 год», — паведамілі ў адміністрацыі.
Расейцы атакавалі Кіеў у некалькі хваляў і з розных кірункаў. Паводле кіеўскіх уладаў, у сталіцы ніхто не пацярпеў, разбурэньняў таксама няма.
Улады Кіеўскай вобласьці, на тэрыторыі якой зьбілі расейскія бесьпілётнікі, паведамілі, што пры падзеньні аскепкаў пашкоджаньні атрымалі 13 прыватных дамоў. Пацярпелыя атрымалі неабходную дапамогу.
У той жа час абласныя ўлады пераконваюць, што аскепкі зьбітых дронаў пераважна падалі за межамі населеных пунктаў.
У апэратыўным камандаваньні Паветраных сіл Украіны паведамілі, што ў ноч на 31 ліпеня Расея атакавала ўкраінскую тэрыторыю 89 дронамі. Сродкі СПА зьбілі ўсе бесьпілётнікі.
ГЛЯДЗІЦЕ ТАКСАМА: У выніку расейскіх абстрэлаў загінулі мірныя жыхары ў чатырох абласьцях УкраіныНа фронце адбылося амаль 200 баявых сутыкненьняў
У Генэральным штабе Ўзброеных сіл Украіны за апошнія содні зафіксавалі 144 баявыя сутыкненьні на фронце.
Расея з авіяцыі і артылерыі атакавала пазыцыі ўкраінскага войска ў Харкаўскай, Данецкай, Запароскай і Херсонскай абласьцях.
На Харкаўшчыне расейцы атакуюць у раёне Ваўчанску і Ціхага, на Луганшчыне Макееўку, на Данеччыне — Часавы Яр і Тарэцк.
ГЛЯДЗІЦЕ ТАКСАМА: Расейскія войскі абстралялі поўдзень Херсоншчыны, дрон ударыў у машыну мэдыкаўРасейцы наступаюць «хвалямі»
Экспэрты амэрыканскага Інстытуту вывучэньня вайны (ISW) зьвярнулі ўвагу на «імпульсныя» наступы расейскіх войскаў — спробы наступаць па ўсёй лініі фронту суправаджаюцца зьніжэньнем інтэнсіўнасьці атак на адных участках і павелічэньнем на іншых.
Як адзначаецца ў справаздачы ISW за 30 ліпеня, усё лета расейскія войскі пэрыядычна праводзілі ўзводныя і ротныя мэханізаваныя атакі ў кірунку Ліману, Часавога Яру і на аўдзееўскім кірунку ў Данецкай вобласьці, а апошнім часам узмацнілі наступальныя дзеяньні на захадзе і паўднёвым захадзе ад Данецку.
Аналітыкі зьвярнулі ўвагу, што расейскія войскі правялі пяць мэханізаваных атак сіламі ад узводу да батальёну на захадзе Данецкай вобласьці 29 і 30 ліпеня. Геалякацыйныя кадры, апублікаваныя 29 ліпеня, сьведчаць пра прасоўваньне расейскіх сіл на паўднёва-заходніх ваколіцах Канстанцінаўкі.
У ISW не выключаюць, што расейцы спрабуюць захапіць Канстанцінаўку, каб перарэзаць трасу Т-0524 Вуглядар — Канстанцінаўка і прымусіць такім чынам адступіць украінцаў з гэтага раёну.
Экспэрты мяркуюць, што гатоўнасьць расейскага вайсковага камандаваньня да вялікіх стратаў у бранятэхніцы без правядзеньня шырокамаштабнай наступальнай апэрацыі на розных кірунках і без дасягненьня апэратыўна важных посьпехаў у доўгатэрміновай пэрспэктыве можа ўскладніць сытуацыю расейскіх войскаў.
«Пакуль што расейскія войскі маюць дастаткова бранятэхнікі для правядзеньня пэрыядычных ротных і большых мэханізаваных штурмаў па ўсёй лініі фронту ў кароткай і сярэднетэрміновай пэрспэктыве. Але незразумела, ці маюць яны неабходныя рэзэрвы бранятэхнікі для правядзеньня адначасовых наступальных апэрацый на некалькіх участках фронту і для замяшчэньня стратаў бранятэхнікі, якія могуць быць у выніку інтэнсыфікацыі мэханізаваных апэрацый», — адзначаецца ў справаздачы.
Аналітыкі мяркуюць, што гатоўнасьць Масквы на абмежаваныя тактычныя посьпехі ў абмен на значныя страты бранятэхнікі будзе ўскладняць сытуацыю расейскіх войскаў на фронце. У той жа час, такія расейскія наступальныя апэрацыі істотна зьнясільваюць украінскае войска.
У ISW мяркуюць, што такі падыход да паслабленьня ўкраінскіх сіл карэлюе з агульнай стратэгіяй Уладзіміра Пуціна наконт Украіны, якая грунтуецца на тым, што Расея зможа ўтрымаць любую тэрыторыю, якую захопіць расейскае войска.
ГЛЯДЗІЦЕ ТАКСАМА: Расейскае войска прасунулася ў Данецкай вобласьці. Ва Ўкраіне пацьвердзілі адступленьнеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.