Добрыя навіны тыдня. IT для студэнтаў з аўтызмам, беларуская мова ў Кіеўскім ўнівэрсытэце

Сталі вядомыя імёны жанчын, якія выйшлі на волю датэрмінова

Гэта:

• Дар’я Лосік, жонка журналіста Свабоды Ігара Лосіка, якога пасадзілі на 15 гадоў. Дар’я правяла за кратамі больш за 1 год і 8 месяцаў за камэнтар «экстрэмісцкаму» мэдыя пра ейнага зьняволенага мужа. Ёй заставалася менш за месяц да канца тэрміну. Падчас зьняволеньня Лосікаў іхную малую дачку Паўлінку гадавалі бацькі Дар’і.

Дар’я Лосік. Архіўнае фота

• Паліна Палавінка, жонка журналіста Белтэлерадыёкампаніі Дзьмітрыя Лукшы, асуджанага на 4 гады. Паліну асудзілі за ўдзел у пратэстах. Яна правяла за кратамі 2 гады і 1 месяц. Ёй заставалася менш за месяц да канца тэрміну.

• Тамара Астрэйка, якую затрымалі за ўдзел у пратэстах. Яна правяла за кратамі больш за 1 год і 7 месяцаў.

• Кацярына Мадзянкова, якую асудзілі за ўдзел у пратэстах. Яна правяла за кратамі больш за 7 месяцаў. У яе ёсьць малая дачка.

Усе палітзьняволеныя вышлі з калёніі № 4 у Гомлі 3 ліпеня. Першапачаткова ў гэтым сьпісе фігуравала імя Сьвятланы Лупач, дачкі журналіста Зьмітра Лупача. Аднак пазьней высьветлілася, што Сьвятлана выйшла на волю 2 ліпеня, бо ў яе скончыўся тэрмін зьняволеньня.

Пачаўся набор абітурыентаў з аўтызмам у IT

Абітурыентаў з дыягназам «аўтыстычны разлад» запрашаюць у Менскі каледж лічбавых тэхналёгій на кірунак «распрацоўка і суправаджэньне праграмнага забесьпячэньня інфармацыйных сыстэм». Сёлета на курс плянуюць набраць 18 чалавек з такім дыягназам. Паступаць могуць абітурыенты пасьля 9-й і 11-й клясаў. У каледжы ўжо вучацца падлеткі з парушэньнем слыху, зроку, апорна-рухальнага апарату, паведаміў дзяржаўны тэлеканал СТВ, заўважыў reform.by.

У Кіеўскі ўнівэрсытэт вернуць беларускую мову

У Кіеўскі нацыянальны ўнівэрсытэт імя Тараса Шаўчэнкі вернуць вывучэньне беларускай мовы. Яе можна будзе вучыць на катэдры славянскай філялёгіі, паведаміў рэктар унівэрсытэту Ўладзімер Бугроў, напісала ўкраінскае выданьне «Укрінформ».

Галоўны будынак Кіеўскага нацыянальнага ўнівэрсытэту імя Тараса Шаўчэнкі. Архіўнае фота

«Беларуская мова — гэта ня толькі мова самаабвешчанага прэзыдэнта Аляксандра Лукашэнкі, гэта мова беларускага народу, ваяроў беларускіх фармаваньняў, якія ў складзе Ўзброеных сіл Украіны змагаюцца за свабоду і незалежнасьць і для Ўкраіны, і для сваёй радзімы», — падкрэсьліў Бугроў.

Зьявіўся падкаст, дзе тэму змогуць выбраць слухачы

Адзін зь іх запусьцілі беларускія журналісты Аляксандар Івулін і Мікіта Мелказёраў. Ён называецца «Нешта будзе». Атрымаць да яго доступ можна за 10 эўра ў месяц. Тэму для іхных размоваў змогуць выбіраць слухачы. Падкаст будзе выходзіць два разы на месяц. Першы выпуск, пра футбол, ужо выйшаў.

Аляксандар Івулін, архіўнае фота

«Мы не працавалі разам з часоў „Трыбуны“, вось вырашылі паспрабаваць яшчэ раз. Тым больш Мікіта енчыў пра падобны фармат апошнія чатыры гады — і ўсё ніяк ня мог пачаць», — пішуць вядоўцы ў анонсе да першага выпуску.

У сеціве зьявіўся альбом беларускага гурту Fratrez

«Ora» — гэта дэбютны і адзіны альбом праекту, які балянсаваў на стыку сакральнай, містычнай і старажытнай мэдытатыўнай музыкі. Пра перавыданьне складанкі зь дзесяці кампазыцый паведаміў у сетках музыка Сяргей Доўгушаў.

Сяргей Доўгушаў. Архіўнае фота

Гэты альбом запісалі 13 гадоў таму ў Музэі-майстэрні Заіра Азгура ў Менску з гукарэжысэрам Віктарам Кісьценем.

«Музычная гісторыя, у аснове якой ляжыць спалучэньне драматычнага, рокавага і сузіральнага. Ora — момант унутранага дзеяньня, імгненьне адхіленьня ад разбуральных карцін рэчаіснасьці. Пяць «ор» — пяць станаў, — распавядаў тады пра альбом Ultra-music.com лідэр гурту Сяргей Доўгушаў.

Праект Fratrez стварылі ў 2008 годзе ў Менску Сяргей Доўгушаў (вакал, тэксты), Наста Папова (скрыпка), Андрэй Еўдакімаў (гітара) і Вольга Палякова (флейта). З 2011 году да яго складу далучыліся Ілона Лесь (віялянчэль) і Аляксандар Ясінскі (баян).

Паслухаць альбомможна тут.

ГЛЯДЗІЦЕ ТАКСАМА: