Паводле яго, яшчэ ў пачатку 2024 году Рада БНР прапанавала абвясьціць цяперашні год Годам Васіля Быкава — 19 чэрвеня спаўняецца 100 гадоў з дня нараджэньня выбітнага беларускага пісьменьніка.
«Гэтую ініцыятыву падтрымалі ў асяродках дыяспары. У Польшчы, Літве, ЗША, Канадзе пройдуць прысьвечаныя Быкаву імпрэзы. У Славянскай бібліятэцы ў Празе адбудзецца канфэрэнцыя і адкрыецца адмысловая выстава, якая будзе працаваць усё лета. Таксама Рада БНР прафінансавала выданьне кнігі „Быкаў-100“ з выбранымі цытатамі Васіля Быкава і ўспамінамі пра яго», — расказаў Сяргей Навумчык.
Днямі ў Празе Рада БНР выпусьціла марку, прысьвечаную Васілю Быкаву. Эскіз маркі зрабіў беларускі мастак (імя яго не называюць дзеля ягонай бясьпекі), скарыстаўшы фатаздымак вядомага беларускага фатографа Ўладзімера Кармілкіна пачатку 90-х гадоў.
«Калі выкарыстоўваць паштовыя і філятэлістычныя тэрміны, дык гэта купон, але ў счэпцы з афіцыйнай маркай Чэскай Рэспублікі ён зьяўляецца дзейсным знакам паштовай аплаты», — сказаў Сяргей Навумчык.
Паводле яго, марку выпусьцілі ў дзьвюх вэрсіях — для ўнутраных і для міжнародных паштовых адпраўленьняў, з выкарыстаньнем так званых «літарных» наміналаў (калі пазначаецца не канкрэтная цана, скажам 10 крон, а лацінская літара В, у такім выпадку пры росьце кошту паштовых паслуг ня трэба клеіць на канвэрт дадатковую марку).
Маркі плянуюць распаўсюджваць пераважна ў дыяспары, але будуць таксама шукаць магчымасьць, каб хоць невялікая частка марак трапіла філятэлістам у Беларусь.
ГЛЯДЗІЦЕ ТАКСАМА: «Наш Быкаў». Сяргей Дубавец: Як Васіль Быкаў «шаблячкай махаў» ГЛЯДЗІЦЕ ТАКСАМА: Быкаў на Свабодзе. «Мы павінны назваць імёны катаў нашых ахвяр» ГЛЯДЗІЦЕ ТАКСАМА: «Наш Быкаў». Сяргей Навумчык: «Быкаў апярэджваў час, нібыта падаючы нейкі знак»Быкаў на Свабодзе: чытайце і слухайце
Народны пісьменьнік Беларусі Васіль Быкаў (1924–2003) стаяў у першых шэрагах дэмакратычнага руху за нацыянальнае адраджэньне ў Беларусі. Ён удзельнічаў у стварэньні Беларускага народнага фронту (1988) і Згуртаваньня беларусаў сьвету «Бацькаўшчына» (1990), Беларускага Хэльсынскага камітэту (1995) і Беларускага ПЭН-цэнтру (1995). Пасьлядоўны крытык Аляксандра Лукашэнкі, Быкаў стаў сымбалем змаганьня зь ягоным аўтарытарным рэжымам. У 1995-м, пасьля гвалтоўнага разгону галадоўкі апазыцыйных дэпутатаў у Вярхоўным Савеце, ён заявіў аб «прэлюдыі фашыстоўскага перавароту», прадказаўшы, што «краінай закіруе прэзыдэнцкая хунта».
Васіля Быкава, якога многія беларусы лічылі «сумленьнем нацыі», прыбралі зь дзяржаўных выданьняў, ягоныя кнігі перасталі друкаваць у дзяржаўных выдавецтвах. Пісьменьніка, намінаванага на Нобэлеўскую прэмію ў літаратуры, прапагандысты шальмавалі, вымусіўшы ехаць у эміграцыю. На Беларусь ён вярнуўся цяжка хворым, усяго за месяц да сьмерці. Пахаваньне Быкава ператварылася ў шматтысячны жалобны мітынг праз цэнтар Менску пад бел-чырвона-белымі сьцягамі.
Апошнія 15 гадоў свайго жыцьця Радыё Свабода стала ці не асноўным каналам звароту Быкава да свайго народу. Нашыя слухачы першыя знаёміліся зь яго новымі творамі, а таксама думкамі, ацэнкамі і прагнозамі.
«Быкаў на Свабодзе» (2005): чытаць кнігу (PDF)
Інтэрвію, выступы беларускага клясыка на Радыё Свабода ў 1991–2003 гг., лісты, малюнкі, фота і ўспаміны. «Надвячоркам кожнага дня я ўключаю прымач і шукаю „Свабоду“. Тое сталася звычкай і патрэбай душы».
«Быкаў на Свабодзе» (2004): слухаць аўдыёдыск
Збор выступаў клясыка беларускай літаратуры ў этэры Радыё Свабода
«Доўгая дарога дадому» (2010): слухаць аўдыёкнігу
Кніга мэмуараў народнага пісьменьніка Беларусі гучыць у аўтарскім выкананьні. Запіс зроблены ў 2002 годзе ў Празе ў студыі Радыё Свабода. Працягласьць гучаньня — 6 гадзін і 22 хвіліны, тыя самыя лічбы пазначаюць і дату сьмерці Васіля Быкава — 22 чэрвеня.