Вярхоўны суд ліквідаваў партыю «Справядлівы сьвет»

На думку чальцоў ліквідаванай арганізацыі, з гэтага моманту ў Беларусі «больш няма партыяў» з «адрозным ад дзейнай улады поглядам на становішча спраў у краіне», якія «прапануюць грамадзтву альтэрнатыўныя варыянты палітычнага і сацыяльна-эканамічнага разьвіцьця дзяржавы».

Паводле інфармацыі BPN, найбліжэйшым часам чальцы «Справядлівага сьвету» зоймуцца «стварэньнем новай палітычнай партыі», якая будзе выступаць за «дэмакратычны і сацыялістычны шлях разьвіцьця дзяржавы і грамадзтва».

2 чэрвеня партыя падала дакумэнты на перарэгістрацыю без сьпісу чальцоў — зь меркаваньняў бясьпекі, 30 чэрвеня Мінюст ёй у рэгістрацыі адмовіў. 26 верасьня Вярхоўны суд адхіліў скаргу на адмову ведамства перарэгістраваць «Справядлівы сьвет».

Сёлета ўлетку і ўвосень былі ліквідаваныя яшчэ дзесяць палітычных структураў: Кансэрватыўна-Хрысьціянская партыя — БНФ, Беларуская патрыятычная партыя, Беларуская партыя «Зялёныя», партыя «Беларуская сацыял-дэмакратычная Грамада», Рэспубліканская партыя, Сацыял-дэмакратычная партыя народнай згоды, Партыя БНФ, Аб’яднаная грамадзянская партыя, Беларуская сацыяльна-спартыўная партыя і Беларуская сацыял-дэмакратычная партыя «Грамада».

Напачатку верасьня стала вядома, што Беларуская аграрная партыя знаходзіцца ў працэсе самаліквідацыі.

Перарэгістраваныя праўладныя Камуністычная партыя Беларусі, Лібэральна-дэмакратычная партыя, Рэспубліканская партыя працы і справядлівасьці. Акрамя таго, зарэгістраваная партыя «Белая Русь».

Напрыканцы 2022 года Аляксандар Лукашэнка заявіў, што «на палітычным полі краіны павінныя працаваць толькі тыя партыі, дзейнасьць якіх адпавядае асноўным прынцыпам унутранай і зьнешняй палітыкі».

У лютым 2023 году ён падпісаў закон, які ўзмацніў патрабаваньні да палітычных сілаў і абавязаў усе існыя партыі прайсьці працэдуру перарэгістрацыі. У канцы таго ж месяца міністар юстыцыі Сяргей Хаменка спрагназаваў, што колькасьць партыяў пасьля перарэгістрацыі паменшыцца да «трох-чатырох».