Новым намесьнікам Карпянкова стаў камандзір САХРу, які з 2020 году пад санкцыямі ЭЗ

Генэрал-маёр Ігар Бурмістраў, які раней займаў гэтую пасаду, звольнены з вайсковай службы ў запас па ўзросьце з правам нашэньня вайсковай формы і знакаў адрозьненьня, паведамляе прэс-служба Лукашэнкі.

Раней Аляксандар Быкаў займаў пасаду камандзіра спэцыяльнага атраду хуткага рэагаваньня (САХР) унутраных войскаў МУС Беларусі. Хоць спэцыяльнае прызначэньне САХР — сілавая падтрымка праваахоўнікаў пры затрыманьні асабліва небясьпечных злачынцаў, найперш узброеных, байцы САХР разам з супрацоўнікамі АМАП і ГУБАЗіК неаднойчы ўдзельнічалі ў затрыманьні праціўнікаў рэжыму Лукашэнкі, супраць якіх пасьля заводзілі палітычна матываваныя справы.

Аляксандар Быкаў яшчэ ў кастрычніку 2020 году трапіў пад санкцыі Эўразьвязу. Афіцыйная падстава ўнясеньня ў санкцыйны сьпіс — «рэпрэсіі і запалохваньне пасьля прэзыдэнцкіх выбараў 2020 году мірных дэманстрантаў, у прыватнасьці адвольныя арышты і жорсткае абыходжаньне, уключаючы катаваньні».

Унутраныя войскі МУС Беларусі былі актыўна задзейнічаныя ў падаўленьні масавых пратэстаў у 2020 годзе, іх таксама прыцягвалі да разгону вулічных акцый у ранейшыя гады.

Камандуючым унутранымі войскамі МУС і намесьнікам міністра ўнутраных спраў Беларусі зьяўляецца Мікалай Карпянкоў, адзін з галоўных выканаўцаў палітычных рэпрэсіяў у краіне. Падчас пратэстаў 2020 году Карпянкоў узначальваў Галоўнае ўпраўленьне барацьбы з арганізаванай злачыннасьцю і карупцыяй МУС, якое вызначылася катаваньнямі грамадзян. ГУБАЗіК працягвае перасьледаваць апанэнтаў улады і цяпер.

Мікалай Карпянкоў вядомы сваімі рэзкімі выказваньнямі супраць праціўнікаў рэжыму накшталт «прадстаўнікі апазыцыі ашалелі і дэградавалі... у іх настолькі ўсяліўся д’ябал, што яны рэальна шалёныя сабакі, якія заслугоўваюць толькі аднаго — сьмерці» і падобнымі.