У Жытоміры, які перад вайной набыў 50 тралейбусаў вытворчасьці «Белкамунмашу», заявілі аб праблемах зь іх рамонтам.
«Мы ні ад кога не хаваем, што БКМ — беларускі тралейбус. Зь лютага ў нас перарваліся ўсе гарантыйныя тэрміны, няма ніякага абслугоўваньня, няма ніякай сувязі з заводам-вытворцам. Там вельмі шмат абсталяваньня, якое рабілі на тэрыторыі Беларусі», — заявіў намесьнік мэра Жытоміра Аляксандар Шаўчук, паведаміла мясцовае выданьне zhitomir.info.
Паводле яго, з 50 купленых у Беларусі тралейбусаў 48 заўсёды выходзяць на маршруты, а два становяцца на рамонт. «Рамонт выконваецца толькі сіламі камунальнага прадпрыемства, ніякімі падраднымі арганізацыямі», — падкрэсьліў ён.
Цяпер гарадзкія ўлады Жытоміру заявілі аб патрэбе і плянах набыць новы транспарт — 15 тралейбусаў з аўтаномнаю хадою і 15 электробусаў.
ГЛЯДЗІЦЕ ТАКСАМА: Беларусь сарвала дамову на пастаўку тралейбусаў у Жытомір, якую падпісалі ў прысутнасьці Лукашэнкі і ЗяленскагаУ сакавіку 2021 году стала вядома, што Беларусь сарвала выкананьне кантракту аб пастаўцы да канца 2020 году ў Жытомір 50 тралейбусаў. Беларускае прадпрыемства тлумачыла праблемамі, якія зьявіліся пасьля падзей у 2020 годзе, а таксама эпідэміяй каранавірусу. Улады Жытоміра зьбіраліся выставіць беларускаму боку штрафнымі санкцыямі, але ўрэшце «Белкамунмаш» выканаў кантракт і Жытомір атрымаў усе 50 тралейбусаў.
ГЛЯДЗІЦЕ ТАКСАМА: «Ня ведалі, што ўвядуць санкцыі і закрыюць мяжу». Улады Мікалаева на другім годзе вайны разрываюць кантракт зь «Белкамунмашам»Гарадзкія ўлады Жытоміру 9 красавіка 2019 году абвясьцілі тэндэр на закуп тралейбусаў, які выйграла беларускае прадпрыемства «Белкамунмаш». Афіцыйную дамову аб пастаўках беларускіх тралейбусаў падпісалі на другім Форуме рэгіёнаў Беларусі і Ўкраіны, які праходзіў 3–4 кастрычніка 2019 году ў Жытоміры. Там адбылася першая і пакуль адзіная сустрэча Аляксандра Лукашэнкі і Ўладзіміра Зяленскага.
Раней кіраўнік «БКМ-Україна» Мікола Раманюк у інтэрвію Свабодзе сьцьвярджаў, што ў тралейбусах «Белкамунмашу» аб’ём украінскіх дэталяў складаў да 25%. Найперш іх камплектавалі ўкраінскімі маторамі.
Міністэрства юстыцыі Ўкраіны ў сьнежні 2022 году зацьвердзіла дакумэнты кампаніі «БКМ-Україна» аб выдаленьні беларускага прадпрыемства «Белкамунмаш» з складу заснавальнікаў. Цяпер яго ўласьнікамі ёсьць луцкае прадпрыемства «РІСТ-Н» і грамадзянін Украіны Сяргей Мартыняк. Такім чынам «БКМ-Україна» захавала магчымасьць працаваць на ўкраінскім рынку.
ГЛЯДЗІЦЕ ТАКСАМА: Як Беларусь едзе ва Ўкраіну не на танках, а на тралейбусахУкраіна спыніла гандаль зь Беларусьсю пасьля таго, як Аляксандар Лукашэнка падтрымаў расейскае ваеннае ўварваньне ва Ўкраіну 24 лютага 2022 году і дазволіў скарыстаць тэрыторыю, вайсковую інфраструктуру і паветраную прастору Беларусі для ўварваньня расейскай арміі і абстрэлаў гарадоў Украіны, ахвярамі якіх сталі дзясяткі тысяч мірных украінцаў.
У першыя дні поўнамаштабнай вайны ўрад Украіны пастанавіў закрыць усе памежныя пункты зь Беларусьсю. Пасьля адыходу расейскіх войскаў з Кіеўскай і Чарнігаўскай вобласьцяў між краінамі працуе толькі адзін пункт пропуску — у Валынскай вобласьці. Празь яго ва Ўкраіну вяртаюцца ўкраінцы, якіх незаконна вывезьлі ў Расею.
У той жа час урад Украіны не забараняў гандаль зь Беларусьсю, як гэта было зроблена стасоўна Расеі. Юрысты, якія знаюцца на міжнародным гандлі, таксама зьвяртаюць увагу, што паміж Беларусьсю і Ўкраінай дагэтуль дзейнічае пагадненьне аб свабодным гандлі, згодна зь якім беларуская прадукцыя пастаўлялася ва Ўкраіну бяз мыта.