Як паведамляецца на сайце МЗС, нагодай стаў нібыта зафіксаваны факт парушэньня дзяржаўнай мяжы Беларусі верталётам польскіх Узброеных сілаў.
«Ад польскага боку запатрабаваны адпаведныя тлумачэньні і правядзеньне ўважлівага расьсьледаваньня інцыдэнту, — гаворыцца ў паведамленьні прэс-службы МЗС. — Пра вынікі расьсьледаваньня і прычыны здарэньня, як гэта прынята ў міжнародных зносінах, павінен быць праінфармаваны беларускі бок у прымальныя тэрміны».
Віцэ-міністар замежных спраў Польшчы Павел Яблоньскі адрэагаваў на гэтую заяву. «Мы будзем аналізаваць сытуацыю, але з вельмі вялікай асьцярожнасьцю трэба падыходзіць да такога кшталту заяў з боку беларускіх службаў», — цытуе яго «Наша Ніва».
Апэратыўнае камандаваньне польскіх узброеных сіл адпрэчыла заяву пра парушэньне мяжы верталётам. Польскае выданьне Wprost працытавала словы падпалкоўніка Яцэка Гарышэўскага пра тое, што заявы беларускага боку — «правакацыя і хлусьлівыя абвінавачваньні».
Раней сёньня Дзяржаўны памежны камітэт паведаміў, што польскі вайсковы верталёт Мі-24 нібыта «на гранічна малой вышыні перасёк дзяржаўную мяжу, заляцеў на глыбіню 1200 мэтраў» на тэрыторыю Беларусі, а потым вярнуўся ў Польшчу.
- Месяц таму, 1 жніўня 2023 г., жыхары памежнай вёскі Белавежа з польскага боку паведамілі ў сацыяльных сетках, што ў паветраную прастору Польшчы заляцелі два беларускія гелікоптэры Мі-8 і Мі-24. Міністэрства абароны Польшчы спачатку гэтага не пацьвярджала, але потым прызнала, што два беларускія верталёты парушылі дзяржаўную мяжу ў раёне Белавежы і ляцелі на вельмі малой вышыні, таму радары іх не пабачылі.
- Міністэрства абароны Беларусі назвала абвінавачаньні ў парушэньні мяжы Польшчы верталётамі Мі-24 і Мі-8 беларускіх ВПС і войскаў СПА «надуманымі».
- Амбасада Польшчы ў Менску паведаміла, што 4 жніўня падала Міністэрству замежных справаў Беларусі «падрабязную інфармацыю», якая пацьвярджае, што два беларускія вайсковыя гелікоптэры 1 жніўня парушылі паветраную прастору краіны. Беларускі бок гэтаму пярэчыць.