Ва Ўкраіне часткова дазволілі спартоўцам выступаць у спаборніцтвах зь беларусамі і расейцамі

Міністэрства моладзі і спорту Ўкраіны зьмяніла тэкст загаду аб забароне на ўдзел украінскіх спартоўцаў у спаборніцтвах, дзе прысутнічаюць атлеты з Расеі ці Беларусі.

Цяпер украінцам забаронены ўдзел толькі ў тых спаборніцтвах, дзе расейцы і беларусы выступаюць «пад сваім нацыянальным сьцягам, выкарыстоўваюць нацыянальную сымболіку або дзеяньнямі ці выказваньнямі выказваюць прыналежнасьць да Расеі ці Беларусі».

У тэксьце гэтага закону пад «нацыянальным» у Беларусі маецца на ўвазе дзяржаўны чырвона-зялёны сьцяг.

Новая рэдакцыя азначае, што Ўкраіна спыняе поўны байкот спаборніцтваў, дзе спартоўцы з Расеі і Беларусі выступаюць у нэўтральным статусе. Праўдападобна, беларусы і расейцы выступяць на Алімпійскіх гульнях 2024 году ў Парыжы акурат не пад дзяржаўнымі сымбалямі, а толькі як нэўтральныя спартоўцы.

Рашэньне ўкраінскага міністэрства было прадыктавана паўнамаштабнай вайной, якую Расея пачала супраць Украіны ў лютым 2022 году, а Беларусь рашэньнем Лукашэнкі падтрымала.

Праз раней абвешчаны татальны байкот украінцы прапусьцілі:

• Чэмпіянат сьвету ў дзюдо і некалькі адборачных стартаў да Алімпіяды-2024;
• Індывідуальны чэмпіянат Эўропы ў фэхтаваньні і некалькі адборачных стартаў да Алімпіяды-2024;
• Старты ў дужаньні;
• Спаборніцтвы ў шахматах.

Шэраг беларускіх спартоўцаў, якія выступілі супраць улады Лукашэнкі і супраць вайны, вымушаныя былі зьехаць за мяжу. Яны неаднаразова скардзіліся на дзеяньні МАК, які амаль за тры гады пасьля пратэстаў ня вырашыў праблемы зь іх статусам і не пакараў дзяржаву за ўмяшаньне ў працу Нацыянальнага алімпійскага камітэту, затое заклапаціўся магчымасьцю іншых атлетаў прымаць удзел у міжнародных стартах.

У такім становішчы, напрыклад, апынуліся лёгкаатлеты Андрэй Краўчанка і Яна Максімава. Яны пакінулі Беларусь праз палітычны перасьлед, а выступаць у нэўтральным статусе змогуць толькі ляяльныя ўладам спартоўцы, якіх адправіць на Алімпіяду Міністэрства спорту.