Палітвязьню Прапольскаму да 8 гадоў дадалі яшчэ паўтара за тое, што «ляжаў на падлозе ШЫЗА». Больш за месяц ад яго няма вестак

Судзьдзя Павел Карцінін прызнаў палітвязьня вінаватым паводле арт. 411 КК (злоснае непадпарадкаваньне патрабаваньням адміністрацыі калёніі) і прызначыў яму ў дадатак да васьмі гадоў калёніі яшчэ паўтара года зьняволеньня.

Напрыканцы траўня яго этапавалі ў мазырскую калёнію № 20, але з 14 чэрвеня ад яго не было яшчэ ніводнай весткі.

Яўгена затрымалі 29 верасьня 2020 году. Дзяржаўнае тэлебачаньне паказала яго ў сваім роліку «МУС Беларусі ідэнтыфікуе адміністратараў „ананімных“ чатаў і ўдзельнікаў пратэстаў». 19 ліпеня 2021 году палітвязьня асудзілі на 8 гадоў калёніі па справе «ўдзельнікаў чата».

На судзе палітзьняволены расказаў пра катаваньні:

«Мяне прымушалі пісаць чыстасардэчнае прызнаньне... Мне пагражалі, катавалі — білі электрашокерам. Добраахвотна я не пісаў заяву. Потым у мяне праблемы са здароўем былі: было дрэнна, кружылася галава, была адбітая нага».

Тэрмін Прапольскага накіравалі адбываць у бабруйскую калёнію № 2. Вядома, што ад самага пачатку адміністрацыя калёніі ціснула на яго. Па інфармацыі праваабаронцаў, ён правёў ня менш за 130 сутак у штрафным ізалятары, а таксама на тры месяцы яго адпраўлялі ў памяшканьне камэрнага тыпу (ПКТ).

Акрамя гэтага, з ініцыятывы адміністрацыі калёніі супраць Прапольскага ўзбудзілі крымінальную справу за «злоснае непадпарадкаваньне патрабаваньням адміністрацыі папраўчай установы».

Паводле матэрыялаў справы, спагнаньні былі выпісаныя за тое, што Яўген «ляжаў на падлозе ШЫЗА»; «у катэгарычнай форме адмовіўся ад прыбіраньня калідора інтэрната атрада, жылой сэкцыі, лякальнай пляцоўкі»; «адмовіўся заняць адведзенае яму спальнае месца ў жылой сэкцыі»; «не прывітаўся пры сустрэчы з прадстаўніком адміністрацыі ўстановы».

Суд над Яўгенам праходзіў на выязным пасяджэньні ў бабруйскай калёніі. Прапольскі на судзе сваю віну не прызнаў.