Сьпікер Дзяржаўнай памежнай службы Ўкраіны Андрэй Дземчанка заявіў Свабодзе, што беларускія памежнікі актывізавалі інфармацыйна-псыхалягічныя апэрацыі на мяжы з Украінай пасьля зьмены кіраўніцтва Дзяржаўнага памежнага камітэту Беларусі.
«За апошні час мы пачалі больш фіксаваць гэтых відэазваротаў, іх пачаў уключаць беларускі бок. Спачатку згадвалі кулінарныя стравы, потым асобныя прадукты харчаваньня, потым перайшлі да палітычнага складніка. Ня выключана, што гэта пачало рабіцца пасьля таго, як памежнае ведамства Беларусі ачоліў Канстанцін Моластаў», — сказаў Андрэй Дземчанка Свабодзе.
ГЛЯДЗІЦЕ ТАКСАМА: Украінцы на мяжы зь Беларусьсю пачалі трансьляваць відэазапіс аб злачынствах расейскіх вайскоўцаў у БучыСьпікер Дзяржаўнай памежнай службы Ўкраіны нагадаў, што цяперашні кіраўнік беларускіх памежнікаў атрымліваў адукацыю ў розных установах ФСБ Расеі.
«Ня выключана, што Расея працягвае навязваць сваіх кандыдатаў на розныя дзяржаўныя высокія пасады ў Беларусі, і менавіта з моманту зьмены кіраўніка павялічылася колькасьць інфармацыйна-псыхалягічных апэрацый, якія мы фіксуем з таго боку мяжы», — сказащ ён.
Андрэй Дземчанка адзначыў, што тады ўкраінскі бок пачаў ажыцьцяўляць адпаведныя адказы.
«Некалькі разоў давалі адказ беларускім памежнікам аб тым, што ня варта спрабаваць уварвацца на тэрыторыю Ўкраіны і падтрымліваць Расею як краіну-тэрарыстку, бо гэта можа нядобра закончыцца для тых, хто будзе спрабаваць зайсьці з тэрыторыі Беларусі са зброяй.
Мы таксама бачым, што да зваротаў да беларускага народу далучаецца, у тым ліку, і полк імя Каліноўскага, іх звароты таксама ўключалі побач зь мяжой, каб той бок мог іх пачуць», — паведаміў сьпікер Дзяржаўнай памежнай службы Ўкраіны.
Днямі ўкраінскія інфармацыйныя рэсурсы паведамілі, што на ўкраінскім беразе Дняпра насупраць беларускага горада Лоеў уключалі запісы зваротаў Сьвятланы Ціханоўскай і камандзіра палка імя Кастуся Каліноўскага, які змагаецца на баку Ўкраіны супраць расейскай агрэсіі.
Паводле Андрэя Дземчанка, беларускія памежнікі даволі часта ўключаюць на сваім баку расейскі гімн.
«Гэта, уласна, таксама можа сьведчыць, што Беларусь, на жаль, застаецца пад дыктатарскім уплывам, у тым ліку і Расеі», — дадаў ён.
На пытаньне, хто стварае ўсе адказы беларускім памежнікам, Андрэй Дземчанка адказаў:
«Неабыякавыя грамадзяне. Некалькі разоў адказвалі і памежныя падразьдзелы», — дадаў сьпікер Дзяржаўнай памежнай службы Ўкраіны.
Андрэй Дземчанка падкрэсьліў, што Ўкраіна ня мае намераў атакаваць Беларусь, нягледзячы на тое, што зь беларускага боку па-ранейшаму застаецца патэнцыйная пагроза.
«Мы памятаем і 24 лютага, і мы разумеем, што на тэрыторыі Беларусі працягваюць заставацца расейскія вайскоўцы. І хоць яны цяпер ня маюць дастатковай групоўкі для нападу, але пагроза зь Беларусі ўсё роўна застаецца. І гэта вынік таго дыктатарскага рэжыму, які ёсьць у Беларусі», — патлумачыў ён.
«Мы разумеем, што беларускі народ ня хоча ваяваць з Украінай, але ён застаецца пад уплывам дыктатуры, якая падтрымлівае Расею, і нагнятае сытуацыю, у тым ліку ядзерным шантажом і магчымым перакіданьнем расейскіх наймітаў прыватных кампаній. Пакуль мы гэтага не фіксуем, але выключыць гэта немагчыма, улічваючы дзеяньні Расеі і падтрымку, якую аказвае Беларусь краіне-тэрарыстцы», — падкрэсьліў Андрэй Дземчанка.
Паводле яго, усе ўкраінскія адказы на інфармацыйна-псыхалягічныя апэрацыі Беларусі зьяўляюцца «папярэджаньнем для тых, хто паспрабуе зайсьці ва Ўкраіну са зброяй», і заклікам да беларускага народу, каб грамадзяне перасталі быць «інструмэнтам у руках дыктатарскай улады».
ГЛЯДЗІЦЕ ТАКСАМА: Украінцы павіншавалі беларускіх памежнікаў з 9 траўня плякатамі пра перамогу над «рашызмам» і гімнам УкраіныЗ пачатку вайны на ўкраінскім баку ў памежжы зь Беларусьсю пэрыядычна зьяўляецца бел-чырвона-белы сьцяг. Украінскія памежнікі таксама дэманстравалі беларускаму боку ролікі пра ваенныя злачынствы расейскай арміі ў Кіеўскай вобласьці. Мясцовыя ўлады назвалі гэта «вайной білбордаў».
ГЛЯДЗІЦЕ ТАКСАМА: Атрымліваў адукацыю ў вучэльні КГБ СССР і Акадэміі ФСБ Расеі. Што вядома пра новага кіраўніка Дзяржаўнага памежнага камітэтуАляксандар Лукашэнка 30 траўня звольніў Анатоля Лапо, які ачольваў Дзяржаўны памежны камітэт Беларусі з канца 2016 году, і прызначыў на гэтую пасаду Канстанціна Моластава. Ён нарадзіўся ў Расеі і вучыўся спачатку ў памежным вучылішчы КДБ СССР, якое знаходзілася ў Алма-Аце, а ў 2004 годзе скончыў Памежную акадэмію ФСБ Расеі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.