Вядомага палітоляга і літаратуразнаўцу Аляксандра Фядуту затрымалі ў красавіку 2021 году. Яго абвінавацілі ў змове з мэтай зьвяржэньня ўлады і асудзілі на 10 гадоў зьняволеньня ва ўмовах узмоцненага рэжыму. Пакараньне Фядута адбывае ў калёніі пад Магілёвам.
«Хлопец, які сядзеў зь Фядутам у карантыне, адправіўся на 10 сутак у ШЫЗА толькі за тое, што зь ім пагаварыў», — расказаў Сяргей (сапраўднае імя зьмененае дзеля бясьпекі. — РС), які ўжо вызваліўся з папраўчай калёніі № 15 пад Магілёвам. Паводле Сяргея, дадатковы ціск зазналі і іншыя палітвязьні, якія былі зь ім у адным атрадзе. Гэта Сяргею засьведчыў асуджаны паводле палітычнага артыкула, зь якім давялося правесьці час у адной камэры штрафнога ізалятара.
«Палову тэрміну ШЫЗА сядзеў з палітычным. Яго пакаралі ў дзень народзінаў. Нічога не парушаў, выконваў парадак ад пачатку да канца, але наўмысна ў такі дзень прычапіліся і далі 10 сутак. Вось так павіншавалі», — расказаў Сяргей.
Паводле палітвязьня, зь якім Сяргей быў у ШЫЗА, палітычныя часьцей за іншых асуджаных атрымліваюць вымовы, пазбаўленьні ад спатканьняў ці перадач і пакараньне штрафным ізалятарам.
«Палітычных ламаюць псыхалягічна: пакараньнямі, ізаляцыяй. Гэта ў нас было і ёсьць», — кажа Сяргей.
Сярод палітвязьняў, якія адбываюць пакараньне ў ПК-15, — вядомы палітоляг і літаратар Аляксандар Фядута, а таксама праваабаронца «Вясны» Валянцін Стэфановіч. Паводле зьвестак з калёніі, у Аляксандра Фядуты вялікія праблемы са здароўем, па тэрыторыі ён ходзіць зь цяжкасьцю, абапіраючыся на кіёк. Пра Валянціна Стэфановіча вядома, што яго накіравалі працаваць на шкодную для здароўя вытворчасьць — чысьціць драты ад ізаляцыі.
ГЛЯДЗІЦЕ ТАКСАМА: Навіны палітвязьняў: журналіст Аляксандраў у калёніі працуе на дрэваапрацоўцы, у Фядуты абвастрыліся праблемы з сэрцам