Ва Ўкраіне пасьля зьнішчэньня Кахоўскай дамбы загінулі 17 грамадзян, яшчэ 31 лічыцца зьніклымі бязь зьвестак

Міністар унутраных спраў Украіны Ігар Кліменка паведаміў, што ў выніку зьнішчэньня Кахоўскай дамбы ў Днепрапятроўскай вобласьці без вады застаюцца 167 тысяч грамадзян.

Паводле яго, у пацярпелыя раёны арганізаваны падвоз пітной і тэхнічнай вады.

Міністар паведаміў, што ў выніку падтапленьняў загінулі сама меней 17 грамадзян. «Зь іх 13 — ад утапленьня, яшчэ 4 атрымалі несумяшчальныя з жыцьцём раненьні ў часе эвакуацыі, 31 зьнік бязь зьвестак», — удакладніў Ігар Кліменка ў сваім тэлеграм-канале.

Улады Херсонскай вобласьці паведамілі, што ўзровень вады ў рэгіёне працягвае зьніжацца. Цяпер ён складае 80 сантымэтраў.

Усё яшчэ падтопленымі застаюцца 5 населеных пунктаў, якія знаходзяцца на падкантрольнай Украіне тэрыторыі.

Згодна з вынікамі маніторынгу, у вадзе Дняпра зафіксавалі перавышэньне жалеза ў два разы. Нафтапрадуктаў ня выявілі.

Міністэрства аховы здароўя Ўкраіны працягвае заклікаць грамадзян не выкарыстоўваць у якасці пітной ваду з адкрытых крыніц.

Разбурэньне дамбы Кахоўскай ГЭС, якое адбылося 6 чэрвеня, пацягнула затапленьне значных тэрыторый ніжэй па цячэньні і абмяленьне вадасховішча вышэй. Дзясяткі населеных пунктаў затопленыя.

Калі на кантраляванай украінскімі ўладамі тэрыторыі рэгіёну эвакуацыя вядзецца пры пасярэдніцтве ратавальнікаў, паліцыі, вайскоўцаў і валянтэраў, дык на акупаваных тэрыторыях сытуацыя складаная.

У Генштабе Узброеных сіл Украіны 12 чэрвеня паведамілі, што ў затопленай Голай Прыстані Херсонскай вобласьці расейскія акупанты дазваляюць эвакуацыю грамадзян Украіны толькі пасьля «атрыманьня хабару», пры гэтым зьнішчаюць пашпарты і пасьведчаньні аб нараджэньні і іншыя дакумэнты ўкраінскага ўзору. Вайскоўцы кажуць, што мясцовых жыхароў перасяляюць у акупаваны Крым і расейскі Краснадар. Праверыць гэтыя зьвесткі зь незалежных крыніц немагчыма.