Хроніка перасьледу 11 красавіка: У Жлобіне затрымалі былога палітвязьня, які два тыдні таму выйшаў з калёніі

Шматдзетную маці пакаралі за паведамленьні пра вайсковыя вучэньні

Берасьцейскі абласны суд 10 красавіка агучыў прысуд у крымінальнай справе 31-гадовай жыхаркі Баранавічаў Анастасіі Падгайскай, якая нібыта разьмяшчала ў тэлеграм-каналах зьвесткі аб становішчы ў рэгіёнах Расеі і Беларусі і вучэньнях на беларускіх палігонах. Яе абвінавацілі ў садзейнічаньні экстрэмісцкай дзейнасьці (ч. 1 арт. 361-4 КК).

Справу разглядаў судзьдзя Андрэй Васілюк, дзяржабвінаваўца — пракурор Аляксандар Бацюшко.

6 красавіка дзяржабвінаваўца запратрабаваў для Падгайскай тры гады абмежаваньня волі без накіраваньня ў ПУАТ («хатняя хімія»).

Суд прызнаў яе вінаватай і пакараў тэрмінам, які прапанаваў пракурор: тры гады «хатняй хіміі», паведамляе «Вясна».

Маці траіх дзяцей Анастасію Падгайскую затрымалі ў канцы 2022 года, і да суду яна была пад хатнім арыштам. Па матэрыялах сьледзтва, Падгайская ў кастрычніку 2022 года нібыта неаднаразова перасылала фота- і відэафайлы з тэкставымі паведамленьнямі ў бот Telegram-канала.

Інфармацыя, адпраўленая ёю, нібыта зьмяшчала зьвесткі аб становішчы ў рэгіёнах Расейскай Фэдэрацыі і Беларусі, а таксама аб вучэньнях, якія праводзіліся на агульнавайсковых палігонах.

За ўдзел у пасьлявыбарнай акцыі пратэсту ў Жлобіне пакаралі «хіміяй» Уладзіслава Бохана

Суд Жлобінскага раёну 31 сакавіка вынес прысуд мясцоваму жыхару Ўладзіславу Бохану, абвінаваціўшы яго ў арганізацыі і падрыхтоўцы дзеяньняў, якія груба парушаюць грамадзкі парадак, або ўдзеле ў іх (ч. 1 арт. 342 Крымінальнага кодэкса), піша «Вясна».

Судзьдзя Сьвятлана Андрэева пакарала Бохана 2 гадамі абмежаваньня волі з накіраваньнем у папраўчую ўстанову адкрытага тыпу.

У Менску затрымалі байкера, які ў 2020 годзе ўдзельнічаў у мотапрабегу салідарнасьці

Праваабаронцы адзначаюць, у відэа сілавікоў мужчына кажа, што падпісаны на «дэструктыўныя тэлеграм-каналы», зь якіх рабіў рэпосты. Яму пагражаюць крымінальнай справай.

У Менску затрымалі грамадзяніна Расеі за бела-сіне-белую налепку на машыне

Як паведамляе «Вясна», затрыманы родам з Пскова. У пакаяльным відэа ён кажа, што набыў дома машыну і прыехаў на ёй у Беларусь.

Гэтую сімволіку выкарыстоўвае таксама легіён «Свободная Россия», які ваюе на баку Украіны. Сілавікі называюць арганізацыю тэрарыстычнай і закідваюць мужчыну прапаганду тэрарызму.

У Жлобіне затрымалі былога палітвязьня, які два тыдні таму выйшаў з калёніі

Свабода заўважыла на тэлеграм-канале, зьвязаным з гомельскай міліцыяй, сюжэт з затрыманьнем «асоб, датычных да экстрэмісцкай дзейнасьці».

Сярод затрыманых — былы палітзьняволены са Жлобіна Пётра Канстанцінаў. Ён кажа пра сябе: «Былы асуджаны».

Пётра Канстанцінаў выйшаў на волю 28 сакавіка. Ён цалкам адбыў увесь тэрмін. Пятра затрымалі ў чэрвені 2021 году ў Жлобіне і абвінавацілі ва «ўдзеле ў групавых дзеяньнях, што груба парушаюць грамадзкі парадак» (арт. 342 Крымінальнага кодэксу).

Крымінальная справа датычыцца падзей 9-10 жніўня 2020 года, калі ў Жлобіне праходзілі акцыі пратэсту.

6 жніўня 2021 года судзьдзя суда Жлобінскага раёну Мікалай Сергеевіч прысудзіў Канстанцінаву два гады калёніі агульнага рэжыму. Ён адбываў пакараньне ў калёніі ў Навасадах (Барысаўскі раён).