Парлямэнт Украіны зьвярнуўся ў МАК: прапанова дапусьціць спартоўцаў з Расеі і Беларусі на Алімпіяду

Дэпутаты Вярхоўнай Рады Ўкраіны лічаць недапушчальным удзел у Алімпіядзе спартоўцаў і судзьдзяў з Расеі і Беларусі.

Вярхоўная Рада Ўкраіны выступіла са зваротам да парлямэнтаў краін сьвету, Міжнароднага алімпійскага камітэту, нацыянальных алімпійскіх камітэтаў і міжнародных спартовых фэдэрацый.

У ім яна заклікала забараніць удзел расейскіх і беларускіх спартоўцаў у міжнародных спартовых спаборніцтвах, у тым ліку ў Алімпіядах, да завяршэньня збройнай агрэсіі Расеі супраць Украіны, вываду расейскіх войскаў з украінскай тэрыторыі і вырашэньня пытаньня кампэнсацыі Расеяй стратаў Украіны. Зварот падтрымалі 324 дэпутаты.

Украінскія парлямэнтары перакананыя, што прапанова дапусьціць на алімпійскія спаборніцтвы расейскіх і беларускіх спартоўцаў — «абраза памяці сотняў тысяч грамадзян Украіны, у тым ліку больш як 220 украінскіх спартоўцаў, якія самааддана сталі на абарону Айчыны і паклалі жыцьцё ў барацьбе за яе будучыню як дэмакратычнай эўрапейскай дзяржавы».

Вярхоўная Рада падкрэсьліла, што гэтыя прапановы ня ўлічваюць надзвычай жорсткага і барбарскага характару вайны, разьвязанай Расеяй пры падтрымцы Беларусі супраць Украіны і накіраванай на генацыд украінскага народу.

У звароце адзначаецца, што Расея сыстэматычна абстрэльвае жылыя будынкі, энэргетычную і сацыяльную інфраструктуру.

«У выніку вайны пацярпелі больш як 320 спартовых аб’ектаў, зь іх 87 зьнішчаныя цалкам або часткова», — паведамляецца ў дакумэнце.

Украінскія дэпутаты перакананыя, што пасьля расейскага ўварваньня лёзунг «Спорт па-за палітыкай» страціў права на існаваньне.

«Супольны ўдзел украінскіх спартоўцаў, зь якіх шмат страцілі на вайне сваякоў і сяброў, і расейскіх і беларускіх спартоўцаў, сваякі якіх забіваюць украінцаў, абумовіць вялікую колькасьць канфліктаў на спартовых пляцоўках. Асабліва небясьпечнымі могуць стаць двубоі на фэхтавальных дарожках, барцоўскіх кілімах, у сэктарах стральбы з агнястрэльнай зброі і спаборніцтваў лучнікаў»,— адзначаецца ў звароце.

Дэпутаты таксама лічаць недапушчальным удзел судзьдзяў з Расеі і Беларусі.

«Вярхоўная Рада Ўкраіны мяркуе, што допуск расейскіх і беларускіх спартоўцаў да міжнародных спаборніцтваў у час, калі трывае вайна Расеі, стане непрыхаванай падтрымкай гэтай вайны і спробай залагодзіць агрэсара», — перакананыя дэпутаты ўкраінскага парлямэнту.

ГЛЯДЗІЦЕ ТАКСАМА: Намер МАК дазволіць расейцам і беларусам рыхтавацца да Алімпіяды-2024 выклікаў спрэчкі. Што гавораць зацікаўленыя бакі

Як разгортваецца канфлікт вакол удзелу расейцаў і беларусаў у Алімпіядзе

25 студзеня Міжнародны алімпійскі камітэт заявіў, што гатовы ўключыць расейскіх і беларускіх спартоўцаў у сьпіс удзельнікаў Алімпіяды пры ўмове выкарыстаньня нэўтральнага сьцяга і даць ім шанец для ўдзелу ў кваліфікацыйных спаборніцтвах. У адказ Кіеў разгарнуў міжнародную кампанію дзеля недапушчэньня ўдзелу расейскіх і беларускіх спартоўцаў у Алімпіядзе-2024.

31 студзеня Масква заявіла, што будзе вітаць любыя крокі МАК, якія дазваляюць расейцам удзельнічаць у Алімпійскіх гульнях. Але празь некалькі гадзін МАК заявіў, што падтрымлівае санкцыі, уведзеныя супраць Масквы і Менску ў сувязі з ваеннай агрэсіяй супраць Украіны.

Міністар спорту Ўкраіны Вадзім Гутцайт заявіў, што Ўкраіна спадзяецца заручыцца шырокай міжнароднай падтрымкай поўнай забароны на ўдзел расейскіх і беларускіх спартоўцаў у Алімпійскіх гульнях у Парыжы ў 2024 годзе за ваенную агрэсію.

МАК назваў гэта паклёпам і заявіў, што такія словы не спрыяюць канструктыўнай дыскусіі.

ГЛЯДЗІЦЕ ТАКСАМА: ЗША падтрымліваюць удзел расейцаў і беларусаў у Алімпіядзе ў якасьці «нэўтральных спартоўцаў» — Белы дом

Выканаўчы дырэктар беларускага Фонду спартовай салідарнасьці Аляксандар Апейкін у інтэрвію Свабодзе заявіў, што, на яго думку, беларусы і расейцы могуць браць удзел у Алімпіядзе толькі ў выпадку актыўнай антываеннай пазыцыі. Дэлегацыю НАК зь Менску на Алімпіяду ў Парыж дапускаць нельга, бо яна прадстаўляе не беларускі народ, а рэжым Лукашэнкі.

Як лічыць Апейкін, МАК павінен вызначыцца, як ён будзе вырашаць пытаньне тых беларускіх спартоўцаў, правы якіх парушыў рэжым.

ГЛЯДЗІЦЕ ТАКСАМА: Фонд спартовай салідарнасьці заклікаў не дапускаць да Алімпіяды спартоўцаў, якія публічна ня выступяць супраць вайны

Вайна Расеі супраць Украіны

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.