Намесьнік начальніка галоўнага апэратыўнага ўпраўленьня Генштабу УСУ брыгадны генэрал Аляксей Громаў заявіў, што правядзеньне ў 2023 годзе супольных з Расеяй вайсковых вучэньняў «Захад» і «Шчыт Саюзу» новай патэнцыйнай пагрозай для паўторнага ўварваньня Расеі на тэрыторыю Ўкраіны.
«Асаблівасьцю гэтых вучэньняў зьяўляецца тое, што ў абодвух выпадках на тэрыторыі Беларусі будзе разгорнутая расейская групоўка войскаў, якая можа быць выкарыстана для адпаведных дзеяньняў. Зыходзячы з гэтага, патэнцыйная пагроза наступу Ўзброеных сіл Расеі з тэрыторыі Беларусі цягам гэтага году будзе захоўвацца», — заявіў Аляксей Громаў 12 студзеня на брыфінгу ў Кіеве.
ГЛЯДЗІЦЕ ТАКСАМА: У Расеі анансавалі на 2023 год два новыя супольныя зь Беларусьсю маштабныя вайсковыя вучэньніУ той жа час украінскі генэрал дадаў, што пакуль на тэрыторыі Беларусі прыкметы фармаваньня ўдарнай групоўкі для аднаўленьня наступу адсутнічаюць.
«Праціўнік актывізаваў чыгуначныя перавозкі ўздоўж дзяржаўнай мяжы Ўкраіны, а таксама працягваецца перакідваньне на тэрыторыю Беларусі падразьдзелаў агрэсара, і адначасова зь Беларусі ў Расею тых частак, якія праходзілі на беларускіх палігонах баявое зладжваньне», — адзначыў Аляксей Громаў.
Паводле яго, падаўжэньне ў Беларусі да 1 красавіка забароны на палёты ўсіх тыпаў цывільнай авіяцыі і бесьпілётнікаў у Гомельскай і Берасьцейскай абласьцях, сумежных з Украінай, а таксама правядзеньне з 16 студзеня па 1 лютага супольных з Расеяй авіяцыйных вучэньняў, сьведчаць аб захаваньні пагрозы ракетных абстрэлаў з паўночнага кірунку.
«Пад выглядам правядзеньня гэтых вучэньняў вораг нарошчвае авіяцыйную групоўку ў Беларусі. На мінулым тыдні на аэрадром „Мачулішчы“ перабазавалі ня менш 10 верталётаў тыпу Мі-8 і Мі-24, а таксама чакаецца перабазаваньне самалётаў апэратыўна-тактычнай авіяцыі на беларускія аэрадромы. Не выключаюцца палёты ў паветранай прасторы Беларусі самалётаў далёкай авіяцыі краіны-агрэсаркі. З улікам гэтага павялічваецца пагроза нанясеньня ракетна-авіяцыйных удараў, прымяненьня дронаў-камікадзе па тэрыторыі Ўкраіны з паветранай прасторы Беларусі», — паведаміў намесьнік начальніка галоўнага апэратыўнага ўпраўленьня Генштабу УСУ брыгадны генэрал Аляксей Громаў.
У сваю чаргу намесьніца міністра абароны Ўкраіны Ганна Маляр удакладніла, што Расея інтэнсіўна перакідвае на тэрыторыю Ўкраіны — у зону баявых дзеяньняў і ў памежжа — тыя свае войскі, якія праходзілі навучаньне ў Беларусі.
«Праціўнік працягвае канцэнтраваць свае асноўныя намаганьні на Данеччыне», — паведаміла Ганна Маляр.
ГЛЯДЗІЦЕ ТАКСАМА: Зяленскі расказаў пра сваё бачаньне сытуацыі ў Беларусі і на ўкраінска-беларускай мяжы
У справаздачы Інстытуту вывучэньня вайны, ацэньваючы вынікі каардынацыйнай нарады, якую 11 студзеня правёў у Львове прэзыдэнт Украіны Ўладзімір Зяленскі аб сытуацыі на паўночна-заходніх межах Украіны, адзначаецца, што паўторнае ўварваньне з тэрыторыі Беларусі для наступу на Кіеў малаімавернае.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.