Пракуратура назвала найбуйнейшы хабар у Беларусі. Карупцыйных злачынстваў сёлета выявілі на траціну больш, чым летась

Аднак, паводле яго, гэта сьведчыць толькі пра павышэньне эфэктыўнасьці выяўленьня такіх злачынстваў

Прадстаўнік пракуратуры заявіў на прэсавай канфэрэнцыі, што пабольшала выяўленых фактаў хабарніцтва, злоўжываньняў і перавышэньняў улады, службовых крадзяжоў. Больш за ўсё карупцыйных злачынстваў учынена ў сфэрах сельскай гаспадаркі, прамысловасьці, транспарту, мэдыцыны, адукацыі.

«Матэрыяльны ўрон ад карупцыйных злачынстваў склаў 19 млн рублёў і кампэнсаваны практычна напалову», — сказаў Грэйба. Кампэнсацыю ўсёй шкоды павінна забясьпечыць арыштаваная маёмасьць хабарніка.

Найбольшы хабар, зафіксаваны ў матэрыялах крымінальных справаў у 2022 годзе, склаў 1 млн даляраў. Грэйба не ўдакладніў, хто атрымаў хабар, за што і ад каго.

Тымчасам пракуратура пахвалілася сваім найлепшым дасягненьнем: замест турмы за карупцыйныя злачынствы — штраф.

Увядзеньне адміністрацыйнай адказнасьці юрыдычнай асобы за карупцыйныя злачынствы Генэральная пракуратура лічыць найбольш значнай сваёй заканадаўчай ініцыятывай за апошнія гады, заявіў Ігар Грэйба.

Арт. 24.59 КаАП (незаконная ўзнагарода ад імя або ў інтарэсах юрыдычнай асобы) уведзены ў дзеяньне з 2021 году.

«Адказнасьць (Штраф. — РС), прадугледжаная за перадачу незаконнай узнагароды ад імя або ў інтарэсах юрыдычнай асобы, складае да 200% кошту перададзеных матэрыяльных каштоўнасьцяў, але ня менш як 50 базавых велічыняў (на сёньня 1,6 тыс. рублёў)», – падкрэсьліў прадстаўнік пракуратуры.

У 2022 годзе ўжо накладалі адміністрацыйныя спагнаньні на суб’екты гаспадараньня, службовыя асобы якіх асуджаныя за дачу хабару, удакладніў ён.

«Лічым, што названая навэля заканадаўства стане адным з эфэктыўных мэханізмаў папярэджаньня карупцыйных праяваў», — заключыў Грэйба.

• Летась у штогадовым рэйтынгу Corruption Perceptions Index 2021 («Індэкс успрыманьня карупцыі»), які складае арганізацыя Transparency International Беларусь была на 82 месцы.
• Жорсткія рэпрэсіі ўлады ў адказ на агульнанацыянальныя пратэсты ў сувязі з фальсыфікацыямі прэзыдэнцкіх выбараў 2020 году прывялі да задушэньня свабоды слова і мірных сходаў, гаворыцца ў прэс-рэлізе TI ў сувязі з публікацыяй справаздачы. Падкрэсьліваецца, што ў выніку зьнішчэньня сыстэмы дэмакратычных стрыманьняў і супрацьвагаў у краіне цяпер пачынаецца «вялікая карупцыя» (grand corruption), зьвязаная з найвышэйшымі палітычнымі элітамі.
• Рэпрэсіі супраць людзей, апазыцыйна настроеных да ўладаў у Беларусі, ставяцца ў справаздачы ў адзін шэраг з гвалтам супраць пратэстоўцаў у Судане і забойствам праваабаронцаў на Філіпінах.
• У справаздачы ТІ-2020 адзначалася, што высокая карупцыя канцэнтруецца ў Беларусі на найвышэйшым узроўні дзяржаўнага кіраваньня.
• Паводле Transparency International, прэзыдэнцкая ўлада ў Беларусі ажыцьцяўляецца практычна без кантролю з боку заканадаўчай і судовай уладаў, эканоміка ў асноўным кантралюецца дзяржавай. Справаздача спасылаецца на выснову экспэртаў Рады Эўропы, якія абвясьцілі, што Беларусь не правяла пераважную большасьць неабходных антыкарупцыйных рэформаў.