Раман Галоўчанка праводзіць перамовы з прэзыдэнтам Ірану Эбрагімам Раісі, а таксама зь першым віцэ-прэзыдэнтам краіны Мухамадам Мухбэрам. Ён падзякаваў Мухбэру за запрашэньне і прамову пра «нелегітымныя санкцыі і ціск на мяжы эканамічнага тэрарызму».
Паводле яго, Беларусь і Іран могуць дасягнуць большага ў гандлёва-эканамічным і інвэстыцыйным узаемадзеяньні, піша БелТА. Усе прапановы будуць уносіцца ў праект дарожнай карты шырокага супрацоўніцтва дзьвюх дзяржаваў на 2023–2026 гг.
Галоўчанка: Беларусі і Ірану важна разам справіцца з выклікамі калектыўнага Захаду
Беларусі і Ірану менавіта зараз асабліва важна сумеснымі намаганьнямі справіцца з тымі выклікамі, якія ставіць перад краінамі «калектыўны Захад», заявіў прэм’ер-міністар Раман Галоўчанка падчас візыту ў Тэгеран 22 лістапада.
«Нашы дзяржавы цярпяць ад нелегітымных санкцыяў, якія знаходзяцца на мяжы эканамічнага тэрарызму», — заявіў ён на сустрэчы зь першым віцэ-прэзідэнтам ісламскай дзяржавы Мухамадам Мухбэрам (фрагмэнт выступу распаўсюдзіла прэс-служба ўраду).
Галоўчанка падкрэсьліў, што візыт беларускай дэлегацыі, які ён назваў «важнай старонкай у гісторыі беларуска-іранскіх адносін», — сьведчаньне актыўнага супрацоўніцтва паміж краінамі ў апошнія дзесяцігодзьдзі.
«Узаемадзеяньне нашых краін характарызуецца высокім узроўнем узаемаразуменьня і высокай дынамікай разьвіцьця практычна ва ўсіх сфэрах. Адбываецца гэта не праз санкцыі, а насуперак ім», — сказаў прэмʼер-міністар.
На яго думку, сёлета беларуска-іранскія адносіны «без перабольшаньня квітнеюць», і нават у «самыя складаныя часы» Менск і Тэгеран «ні на хвіліну не перарывалі актыўнага палітычнага, гуманітарнага, эканамічнага дыялёгу».
Пасьля візыту ў Іран беларуская ўрадавая дэлегацыя накіруецца ў Сырыю.
У Галоўчанкі заплянавана сустрэцца з прэзыдэнтам Сырыі Башарам Асадам і прэмʼер-міністрам Хусэйнам Арнусам.
Галоўчанка таксама возьме ўдзел у беларуска-іранскім бізнэс-форуме, наведае шэраг прадпрыемстваў Ірану, а таксама правядзе перамовы, у выніку якіх плянуецца падпісаць дамовы аб супрацоўніцтве.
У студзені–верасьні 2022 году таваразварот паміж Беларусьсю і Іранам вырас да $63,6 млн (рост у 2,9 раза да аналягічнага пэрыяду 2021 году), экспарт — да $48,6 млн (у 4,4 раза), імпарт — да $15 млн (рост на 41,8%). Сальда станоўчае — $33,6 млн.
24 лістапада прэмʼер-міністар Беларусі наведае Сочы, дзе ў яго заплянаваная сустрэча з губэрнатарам Краснадарскага краю Веньямінам Кандрацьевым.
ГЛЯДЗІЦЕ ТАКСАМА: Прэм’ер Галоўчанка прапануе вазіць рабочых і моладзь на месца расстрэлаў пад Гомлем. Але не да канца зразумела, хто там пахаваны ГЛЯДЗІЦЕ ТАКСАМА: Як мінімум 10% расейскага крэдыту Беларусі патрацяць на ваенныя праекты